Tungod sa nagpadayong hulga sa African Swine Fever (ASF) sa Negros Island Region ug uban pang mga lalawigan, gilugwayan ni Cebu Governor Pamela Baricuatro ang pagdili sa pagsulod sa mga buhing baboy, karne sa baboy, ug mga produktong gikan sa baboy ngadto sa 45 ka adlaw.
Ubos sa Executive Order 44, nga gipirmahan niadtong Huwebes, Agusto 20, 2026, ang orihinal nga 45 ka adlaw nga restriksyon nga gipahamtang sa Executive Order 38 gilugwayan og laing 45 ka adlaw.
“Negros Island's proximity to Cebu and the regular movement of persons and goods require heightened vigilance at all ports and points of entry,” tipik sa pamahayag sa EO 44.
Ang unang pagdili ni-expire na niadtong Biyernes, Agosto 21.
Tumong sa paglugway niini ang pagpanalipod sa lokal nga industriya sa baboy, supply chain sa karne sa baboy, ug ekonomiya sa agrikultura batok sa hulga sa ASF.
"The continued occurrence and threat of AS in Negros Island and other affected provinces and areas necessitate the maintenance of precautionary measures to prevent the introduction and spread of AS within Cebu,” matod sa direktiba.
"Extending the prohibition and strengthening biosecurity measures are necessary to protect Cebu’s hog raisers, consumers, businesses, food supply, and agricultural economy," dugang niini.
Ang pinakabag-ong lakang nagsunod sa serye sa mga direktiba sa ehekutibo nga gitumong aron pugngan ang pagkuyanap sa virus gikan sa mga silingang lugar.
Niadtong Hunyo 26, nagpagawas si Baricuatro og Executive Order 36, alang sa pagpatuman sa 45 ka adlaw nga restriksyon ug random nga mga checkpoint sa utlanan alang sa mga kahayupan gikan sa Negros Occidental human sa pag-ulbo sa ASF sa Sugbo.
Gimandoan sa maong mando ang mga lokal nga yunit sa gobyerno nga i-aktibo ang ilang tagsa-tagsa ka ASF task force ug ipatuman ang estriktong inspeksyon sa mga pantalan, diin gikinahanglan ang balido nga veterinary clearance alang sa mga produkto nga karne sa baboy.
Niadtong Hulyo 7, gipatuman sa Executive Order 39 ang 45 ka adlaw nga pagdili sa mga buhi nga baboy, karne sa baboy, ug mga produkto nga karne sa baboy gikan sa Negros Island ug uban pang apektadong lugar human nakumpirma ang mga kaso sa impeksyon sa Bacolod City, Negros Occidental, ug La Libertad, Negros Oriental. Bisan pa nga ang mga opisyal sa Negros Occidental nagtaho og 1,902 ka mga baboy nga namatay sa 12 ka local government unit (LGU) hangtod niadtong Hunyo 25, dili tanang pagkamatay gipasangil sa ASF tungod sa limitado nga kapasidad sa pagpahigayon og mga pagsulay o testing.
Gimandoan ni Baricuatro ang Provincial Veterinary Office (PVO), mga hingtungdang ahensya sa gobyerno, mga awtoridad sa pantalan, ug mga LGU nga pahugtan ang inspeksyon ug pagpatuman sa mga lagda sa tanang tugpahanan, pantalan, pasilidad sa roll-on/roll-off, ug pribadong mga landing area.
Sumala sa mando, "shipments and conveyances reasonably suspected of carrying prohibited or regulated commodities shall be inspected and verified in accordance with law."
Dugang nga gilatid sa EO 44 nga "ang mga kargamento nga walay pagtugot o gidili dili pasudlon, kumpiskahon, ibalik, ilabay, o kaha atimanon subay sa mga angay nga balaod, lagda, ug regulasyon."
Ang maong mando nagmando usab sa pagpatuman sa mga protocol sa biosecurity sa tanang mga umahan sa baboy, mga ihawan, ug mga negosyante sa kahayupan sa probinsya.
Naglakip kini sa mga restriksyon sa pagsulod alang sa mga tawong dili kinahanglanon ang presensya, mandatory nga disinfection sa mga sakyanan ug ekipo, ug hustong dokumentasyon alang sa pagbalhin sa mga hayop.
Ang mga lokal nga nagbuhi og baboy kinahanglang mo-report dayon ngadto sa mga lokal nga beterinaryo kung adunay mga hayop nga nagpakita og mga simtomas nga may kalabotan sa ASF.
Padayon nga susihon sa PVO ang sitwasyon sa ASF sa Sugbo ug sa mga kasikbit nga probinsya.
"The assessment shall consider DA and BAI advisories, laboratory and surveillance results, epidemiological developments, and other relevant risk factors," "matod sa EO, aron matino kon ang pagdili ba bag-ohon, tangtangon, o palugwayan.
Human gipalugwayan ang pagpatuman sa 45 ka adlaw nga ban, adunay mga natala nga pagsulay sa pagpalusot og mga baboy sa probinsya nga napugngan sa mga awtoridad.
Pito ka adlaw sa wala pa matapos ang deadline sa unang Executive Order (EO), 104 ka buhi nga mga baboy nga nagkantidad og P520,000 ang napugngan sa pantalan sa Brgy. Poblacion, Badian ug kini gipatay sa paaging dili makapahasol sa hayop (humanely euthanized) ug gilubong.
Niadtong Hulyo 8, usa ka barko nga gituohang nagkarga og mga baboy ang misulay unta sa pagdunggo sa Ronda apan mibalik ra human gisita sa kapulisan.
Niadtong Hulyo 10, napugngan sa mga awtoridad ang 42 ka baboy sa Tangil Wharf sa Dumanjug ug gipabalik kini sa Negros Oriental tungod sa paglapas sa ban.
Niadtong Agosto 9, duha ka baktin nga gidala gikan sa Negros ngadto sa Brgy. Tuble, Moalboal, ang gipabalik pagkasunod adlaw human nasayran sa mga lokal nga opisyal ang pagsulod niini. / CDF