Kinsay nagtugot sa Cebu Coalition of United Vendors Association (CCUVA) pagdumala sa night market sa dalan Junquera ug Colon?
Pipila ka sakop sa Cebu City Council ningkuwestiyon sa CCUVA sa ilang awtoridad sa pag-operate ug pagdumala sa Night Market, hinungdan sa pagdapit sa Konseho sa City Legal Office (CLO) atol sa usa ka executive session bahin niini.
Sa Resolution 16 niini nga pinetsahan og Oktubre 16, 2023, ang Konseho niingon nga ang night market kinahanglan nga gipadagan sa Cebu City Market Authority kay proyekto kini sa City Government, gawas lang kon kini pinaagi sa balaod o kasabutan nga kini nga function itugyan sa usa ka pribadong organisasyon o asosasyon.
Kalabot sa operasyon sa merkado, ang CCUVA nagkolekta og space rental, “arkabala” ug mga bayrunon aron mabayran ang galastuhan sa kuryente, ug uban pa, sa kantidad nga P200 kada stall.
Ang kantidad nga nakolekta isip cash ticket o “arkabala” sa City Treasurer’s Office kay P20 lang.
‘ORGANIZER’
Si Cebu City Councilor Jocelyn Pesquera, chairperson sa committee on tourism, niingon nga sa pagsugod sa night market, ang CCUVA usa lang sa mga organisasyon nga gikuha sa organizing committee.
Siya niingon nga ang Cebu City Tourism Commission maoy nagsugod sa night market sa dalan Colon niadtong 2022 ug wala sila mangolekta og bayad gikan sa mga vendor, ingon nga ang matag organisasyon nagdumala sa kaugalingon nga mga tawo.
Gipasabot niya nga ang pag-apil sa CCUVA dili gyud isip organizer, apan usa lang sa ubang grupo nga gitinguha nga ibaligya sa merkado.
Apan ang organizer sa Colon Night Market nga si Maria Pino nitug-an sa SunStar Cebu nga ang night market dili proyekto nga gipasiugdahan sa Cebu City Government.
Si Pino niingon nga ang vendors maoy nihangyo sa City Government nga tugotan sila nga magbutang og stalls sa gabii sa dalan Colon, sanglit ang pagbaton niini makasuporta kanila.
Bahin sa P200 nga abang, si Pino niingon nga kinahanglang mangolekta sila og abang sa mga vendor tungod kay adunay mga bayrunon nga ilang bayranan, nga naglakip sa bayranan sa kuryente, personnel honorarium, ug alang sa pagpanindot.
Gipasabot niya nga gikan sa P200 nga abang sa matag vendor, P20 ang mapunta sa City Government. Matod ni Pino nga gawas sa paghatag og honorarium sa mga nagtrabaho nga personnel nga P200-P260, ila usab kining gihatagan og pagkaon.
LAING REKLAMO
Si Nestor Archival, minority floor leader sa City Council, niingon nga laing reklamo kalabot sa night market kay dunay mga vendor nga dili taga dakbayan sa Sugbo.
Si Pesquera niingon nga nakadawat sab siya og mga reklamo kon nganong wala maapil o tugoti ang pipila ka mga vendor nga makabaligya sa night market.
Laing reklamo mao ang namugna nga trapiko tungod sa pag-okupar sa usa ka lane sa dalan, labina panahon sa rush hours nga apektado na daan dili halayo sa proyekto sa Cebu Bus Rapid Transit sa Osmeña Blvd. ug N. Bacalso Ave.