Aron mapugngan ang koordinasyon sa krimen ug ang paghatag og suborno sulod sa bilangguan, ang Mandaue City Council nagtinguha sa pag-aprobar sa usa ka bag-ong ordinansa nga magdili sa dili awtorisado nga paggamit, paghupot, o pagpayuhot sa mga mobile phone ug mga electronic communication device sa maong mga pasilidad.
Ang ordinansa nga gihimo ni Konsehal Oscar Del Castillo Jr. maghatag og kusog sa kaniadto’ng huyang nga gipatuman nga lagda.
“Karon man gud sa wala pa ang ordinansa, walay ngipon ang reminder. Bawal siya pero walay klarong silot,” matod ni Del Castillo.
Kaniadto, ang pagdili sa mga mobile phone sa mga prisohan naglungtad lamang isip usa ka pahinumdom o internal nga polisiya nga sagad gibalewala tungod sa kawalay legal nga sangpotanan.
Apan kon mapasar na kini nga ordinansa, ang mga malapason apil na ang mga inmates, bisita, ug bisan ang mga jail officer mahimong mag-atubang og pagkabilanggo sulod sa tulo ngadto sa unom ka bulan ug/o multa nga P5,000.
Ang ordinansa hugot nga nagdili ni bisan kinsa sa pagpayuhot, paggamit, o pagdala sa maong mga kahimanan sulod sa bilangguan, gawas kon ang paggamit niini opisyal nga giaprubahan alang sa mga emerhensiya, e-dalaw (electronic visitation), o mga online court hearing.
Bisan ang mga personnel ug staff sa bilangguan kinahanglang ideklara ang ilang mobile device sa pagsulod nga nagdetalye sa brand, tipo, ug deskripsyon alang sa hustong dokumentasyon.
Mga opisyal lang nga gi-assign ug rehistrado nga device ang gitugotan sa mga gipili nga lugar.
Bisan unsang paglapas moresulta sa pagkumpiska sa device ug depende sa nakasala kon kini PDL (Person Deprived of Liberty), bisita, o staff, adunay katugbang nga mga silot apil na ang pagdumili sa pagsulod, pagkawala sa benepisyo, o posibleng pagkabilanggo.
Ang ordinansa moepekto 15 ka adlaw human sa pagmantala ug pag-post sa City Hall bulletin board ug sa mga lokal nga mantalaan. / Yvon Maratas, Benedicto College intern