Pagguba sa balay ‘motibo’ sa pagpatay

Pagguba sa balay ‘motibo’ sa pagpatay
ilippine Army Scout Ranger giingon nga nipusil sa iyang manghod nga babaye ug bayaw niadtong Biyernes sa hapon. Ang igsuon sa suspek ni-survive apan ang bana namatay sa iyang mga samad pinusilan sa tambalanan. / DARIO V. GIL, TAMPO

Giingong kasungian labot sa pagpanag-iya sa usa ka ancestral house maoy motibo sa pagpamusil niadtong Biyernes sa hapon sa lungsod sa Dalaguete nga nikalas og usa ka kinabuhi.

Ang magtiayon nga sila si Dominador, 59, ug Vilma, 57, taga Brgy. Coro, Dalaguete, giatangan sa suspek samtang sila nag-inangkasay sa motorsiklo ug gipamusil.

Ang suspek mao ang igsuon ni Vilma nga si alyas Totoy, 60, kanhi sakop sa Philippine Army Scout Ranger apan giingong nag absent without official leave (AWOL) kaniadto.

Ang suspek giingon nga nasuko nga gipaguba sa magtiayon ang balay nga giingon nga gipanag-iya sa iyaan sa magsuon, apan giangkon usab ni Totoy nga iyaha.

Ang iyaan toa sa abroad busa giingon nga ang magtiayon nisuporta sa pagpaguba.

Nasayran sa Superbalita Cebu sa imbestigasyon sa kapulisan ubos sa ilang hepe nga si P/Maj. Vincent Awit Zozobrado, nga ang biktima’ng magtiayon gikan sa barangay hall sa Cawayan, kay nangayo og proteksyon sa mga barangay tanod inig hakot sa ginubang mga kahoy sa ancestral house.

Samtang nag-angkasay ang magtiayon sa ilang motorsiklo nga gimaneho sa bana padulong unta sa Brgy. Poblacion, Dalaguete, si Totoy diha gaatang sa daplin sa kalsada.

Giingon nga nasuko si Totoy sa magtiayon kay nialalay sa ilang iyaan nga si Rosita nga tua na sa abroad nga nangangkon pod nga iya ang maong ancestral house.

Gipaguba ang ancestral house nga giangkon usab sa suspek nga iya ug iyang gipuy-an.

Si Dominador nakabaton og samad pinusilan nga nilapos sa iyang lawas nga maoy nakaingon sa iyang kamatayon.

Samtang si Vilma nakabaton og samad pinusilan sa tuong bukton ug sa wa’ng paa.

Matod pa nga si Dominador nakamaniho pa pagpadagan sa iyang motorsiklo nga nidangop sa ospital sa Brgy. Poblacion.

Ang magtiayon gi refer sa Vicente Sotto Memorial Medical Center (VSMMC) sa Dakbayan sa Sugbo, apan si Dominador patay nang niabot.

Ang kapulisan sa Dalaguete nagpadayon pa sa ilang hot pursuit operation sa pagsuwat ning taho.

Matod sa kapulisan si Totoy nagpa blotter niadtong Mayo 14, 2024 kay gipa demolished sa iyang iyaan pinaagi sa backhoe ang iyang giangkon ug gipuy-an nga ancestral house nga way pagtugot kaniya.

Duna pa siyay mga butang ug mga sapot nga naa sa maong ancestral house.

Ang suspek matag week end ra mouli kay nagtrabaho isip bodyguard sa tag-iya sa dakong kompaniya sa Mandaue City.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph