GILATID ni Mayor Nestor Archival sa Dakbayan sa Sugbo ang roadmap sa iyang administrasyon alang sa sunod nga tulo ka tuig atol sa usa ka tigom kauban ang bag-ong napiling mga opisyal ug mga hepe sa nagkalainlaing departamento sa Biyernes, Hulyo 5, 2025, sa Cebu City Social Hall.
Sa usa ka pamahayag gikan sa Cebu City Public Information Office, ang tigom nga giorganisar sa Department of the Interior and Local Government (DILG) Cebu City, nagsilbing plataporma aron ipresentar ni Archival ang iyang mga prayoridad lakip na ang panglawas, seguridad sa pagkaon, edukasyon, digital governance, pabalay, ug pagdumala sa trapiko.
Nag-una sa iyang agenda ang paghuman sa dugay nang nalangan nga Cebu City Medical Center (CCMC) nga iyang gihulagway isip usa ka mahinungdanong bahin sa imprastraktura sa panglawas sa siyudad.
Gihisgutan sab niya ang pagpalambo sa seguridad sa pagkaon, sanglit namatikdan niya nga ang siyudad nag-agad pag-ayo sa gawas nga mga tinubdan alang sa suplay sa pagkaon.
Aron masulbad kini, gisugyot ni Archival ang paghimo og pilot demonstration farms sa amihanan ug habagatan nga mga distrito, ug ang pagpalambo sa mga sistema sa irigasyon aron dasigon ang lokal nga produksyon sa pagkaon.
Sa edukasyon, gisaad sa mayor ang pagpalambo sa 24/7 nga serbisyo sa Cebu City Public Library lakip na ang pag-upgrade sa ikaduhang andana niini aron daghan ang maalagaran nga mga estudyante.
Aron mahapsay ang mga serbisyo ug maminosan ang bureaucracy, matod ni Archival nga ipadayon sa kagamhanan sa siyudad ang digitalization ug interconnection sa isig ka departamento.
Iyang gipunting sab ang ideya sa usa ka adlaw nga proseso sa business permit renewal isip kabahin sa paningkamot nga mapauswag ang ka episyente sa City Hall.
Gipasiugda sab ni Archival ang kaluwasan sa publiko, nga nag-ingon nga ang siyudad naglantaw sa pag-instalar sa mga sistema sa CCTV nga gipadagan sa artificial intelligence (AI) sa mga importanteng lugar aron mapalambo ang surveillance.
Ang kalungtaran sa kalikopan usa sab sa hisgutanan.
Nanumpa si Archival nga hingpit nga ipatuman ang solar ordinance sa siyudad nga magkinahanglan sa pag-instalar og mga solar energy system sa tanang building nga gipanag-iya sa siyudad.
Matod niya nga ang mga lagda sa pagpatuman alang sa ordinansa mahuman sa dili madugay.
Kini matod niya, kuyogan sa mas lig-on nga kampanya sa pagtanom og mga kahoy.
Ang pabalay nagpabilin nga usa ka importanteng kabalaka ug matod ni Archival nga ang iyang administrasyon magtrabaho pag-ayo kauban ang City Engineering Office aron mailhan daan ang angay nga relokasyon nga mga lugar.
Aron masulbad ang padayon nga problema sa baha sa siyudad, nanawagan ang mayor alang sa usa ka pagrepaso ug pag-update sa master plan sa drainage sa Cebu City.
Giila sab niya ang mga hagit sa suplay sa tubig sa siyudad ug gipasiugda ang panginahanglan nga susihon ang long-term nga mga solusyon.
Ang traffic congestion sa daghang mga lugar sama sa Talamban, Lahug, Salinas Drive, ug habagatang bahin sa siyudad usa sab ka importanteng isyu.
Si Archival niingon nga ilang sutaon ang traffic strategy sa siyudad kon unsaon nga mapagaan ang mga bottleneck sa maong mga dapit.
Nagplano sab siya nga dugangan ang koleksyon sa kita pinaagi sa pagpalambo sa koordinasyon tali sa City Assessor’s Office ug sa Treasurer’s Office.
Si Bise Mayor Tomas Osmeña kinsa namulong sab sa tigom, niingon nga ang maayong pagdumala nagsugod sa pag-ila sa mga problema ug paghatag og praktikal nga mga solusyon.
“Modangop ang mga tawo sa gobiyerno alang sa mga serbisyo nga dili nila makuha gikan sa pribadong sektor. Dinhi kita mosulod,” matod ni Osmeña. / CDF