Grabeng kasagmuyo tungod sa nagkalawom nga pulitikanhong panagbangi sa Kongreso ug sa mga lokal nga lider ang rason ni Deputy Speaker ug Cebu 5th District Rep. Vincent Franco “Duke” Frasco sa wala pagpirma sa manifesto sa padayon nga liderato ni Speaker Ferdinand Martin Romualdez.
Matod ni Frasco sa publiko niadtong Lunes, Hunyo 9, 2025, nga gipili niya nga wala mopirma sa pag-endurso sa padayon nga liderato ni Romualdez sa 20th Congress.
Iyang gibutyag nga gihangyo siya nga mopirma sa manifesto duha ka adlaw human sa Mayo 12 nga nasudnon ug lokal nga eleksyon.
Nidugang siya nga ang iyang desisyon gisundan sa mga semana nga konsultasyon uban sa mga kaubang magbabalaod, lokal nga opisyal, ilabi na gikan sa Visayas ug Mindanao, ug sa iyang kaugalingong mga konstituwente.
“I have not signed the manifesto, and after careful reflection, I have decided not to,” matod ni Frasco.
Gisaway ni National Unity Party (NUP) President ug Camarines Sur Rep. L-Ray Villafuerte ang pagdumili ni Frasco sa pag-endurso kang Romualdez nga gihulagway nga pagsupak sa nagkahiusang posisyon sa NUP.
Matod ni Villafuerte nga pormal nga gideklarar sa partido ang hingpit nga suporta alang sa Speaker sayo pa sa Mayo.
Ang lakang ni Frasco niresulta sa iyang pagkalagpot gikan sa NUP tungod sa pagsupak.
Samtang, gipanghimakak ni Tingog Party-list Rep. ug asawa ni House Speaker Martin Romualdez, Yedda Romualdez, niadtong Sabado, Hunyo 7, nga nagtinguha siyang maggobernador sa Sugbo sa 2028.
Iyang gihagit si Frasco nga susihon sa Commission on Elections (Comelec) kon rehistrado ba siya sa Lungsod sa Liloan.
Politikanhong
pagkabahinbahin
Gibutyag ni Frasco nga ang iyang desisyon wala gitumong aron makamugna og dugang panagbangi apan aron manawagan alang sa accountability ug kahiusahan sa liderato sa Kongreso.
Iyang gitataw nga ang panaghiusa sa katawhan napapas tungod sa mga politikanhong agenda, ug nanawagan sa liderato sa Kongreso nga paluyohan ang tinguha ni Presidente Ferdinand Marcos Jr. alang sa nasudnong kahiusahan ug epektibo nga pagpadagan sa gobiyerno.
“There is deep disappointment that the unity our people once hoped for has been steadily undermined by political and personal interests. Our duty as public servants is not to advance individual interests, but to serve the Filipino peoplem,” matod ni Frasco.
Si Frasco nahimo kaniadto nga mayor sa Liloan gikan sa 2007 hangtod 2016 sa wala pa siya mapili isip kongresista sa ika-5 nga distrito sa Sugbo niadtong 2019.
Siya nasublian niadtong 2022 ug nahimong Deputy Speaker sa ika-19 nga Kongreso.
Usa siya ka miyembro sa National Unity Party (NUP) hangtod sa iyang pagkalagpot ug kaniadto nakig-uban sa Lakas–Christian Muslim Democrats (CMD), United Nationalist Alliance (UNA), ug sa Liberal Party.
Ang iyang asawa, si Christina Garcia-Frasco, kasamtangan nga nagserbisyo isip Kalihim sa Turismo. / DPC