Pagkaligo sa kadagatan sa Moalboal gipahunong

SunStar Local News
SunStar Local News

Temporaryong gipahunong ang pagpahigayon og island hopping ug snorkeling sa nabantog nga dive sites sa lungsod sa Moalboal tungod sa presensya sa box jellyfish o bokya.

Gipahibawo sa kagamhanan sa lungsod sa sa habagatang Sugbo nga dili niini tugotan ang pagpahigayon og island hopping ug snorkeling sa kadagatan sa lungsod aron ma­siguro nga luwas ang mga mangaligo, ilabi na ang mga turista.

Matod sa Philippine Coast Guard Moalboal Substation nga nakadawat sila og impormasyon gikan sa mga bisita human na­matikdan niini ang mga box jellyfish nga naglutaw-lutaw sa Pa­nag­sama beach sa Mayo 28, 2024.

Giingong upat sa mga nangaligo sa dagat ang nakasinati og pagpangatol sa lawas hinungdan nga daling gidala sa tambalanan.

Nakita usab sa lawas ug pa­nit sa mga biktima ang mga puwa nga marka nga gituohang inagian sa gaway sa bokya. Anaa na hinuon kini sa luwas nga kahimtang.

Ang maong matang sa jellyfish sama sa porma sa box o karton kansang mga sting o gaway ‘highly toxic’ ug posibling moresulta sa kamatayon sa mabiktima niini.

Kahinumdoman nga sa Hun­yo 2023, usa ka babaye nga naligo sa Santa Fe, isla sa Bantayan, si­kat nga beach destination sa Sugbo, namatay human natusokan sa gaway sa box jellyfish. / ANV

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph