Gihangop sa hepe sa Police Regional Office (PRO) 7 Police Brigadier General Redrico Maranan ang pagkasakmit sa 25 kilos nga shabu nga mobalor sa P170 milyunes nga gisuway pagpalusot sa pantalan sa dakbayan sa Sugbo gikan sa kaulohan agi sa siyudad sa Masbate niadtong Huwebes, Enero 23, 2025.
Una na nga na-intercept sa Philippine Drug Enforcement Agency (PDEA) 7 Seaport Interdiction Unit, Naval Forces Central, PNP Regional Police Drug Enforcement Unit, PNP Drug Enforcement Group, PNP Maritime Group, Philippine Coast Guard, Cebu Port Authority, Bureau of Customs ug Cebu City Police Office ang sakyanan nga gikarga sa usa ka barko gikan sa Masbate.
Atol sa gihimong random inspection sa PDEA-7, nabantayan nga kadudahan na ang driver sa usa ka Sedan nga tungod niini, ila kining gisusi pinaagi sa ilang K9 Unit nga si Bayani.
Nakita ang usa ka dako nga karton nga gibutang sa compartment diin dinhi nasuta nga ang sulod niini usa ka illegal nga drugas human nga si Bayani milingkod ug misugat sa ilang panan-aw ang dagkong putos sa gituohang shabu.
Matod ni Maranan, ang maong malampuson nga pagkasakmit sa illegal nga drugas resulta kini sa walay paglugak nga kampanya batok sa illegal nga drugas ug pagkasikop sa mga high profile drug player.
Gawas niini, ang maayong relasyon ug teamwork sa kapulisan sa PDEA ug ubang mga tinugyanan sa balaod sa Central Visayas.
“This successful seizure highlights our commitment to eradicating illegal drugs and protecting our communities. Through effective collaboration with our partner agencies, we have prevented dangerous substances from harming lives. We will continue our strategic efforts to maintain a drug-free Central Visayas," matod ni Maranan.
Dugang ni Maranan nga ang kapulisan magpadayon ang dedikasyon sa subsob nga kampanya batok krimen nga sagad sa naulipon sa drugas aron magpabilin ang kalinaw sa tibuok rehiyon. / AYB