GIDAYEG ni Cebu Governor Pamela Baricuatro ang pagkasakmit sa kapulisan sa moabot P20 milyunes nga balor sa ilegal nga drugas gikan sa usa ka babaye nga negosyante sa Dakbayan sa Talisay niadtong Hulyo 5, 2025.
Si Baricuatro nibahad sa mga kriminal ug mga durugista nga hunongon ang mga dili maayo'ng kalihukan sa Lalawigan sa Sugbo.
Subay sa nahitabong tigom niini tali sa kapulisan, gipahibalo niya nga andam ug alerto ang kapulisan sa pag-monitor sa mga ilegal nga kalihukan sa Probinsiya sa Sugbo ubos sa iyang pamunoan.
“I commend sa ilang nabuhat, dako kaayo ni nga butang. This is something nga angay sila i-commend kay kaning drugs it would create monsters of how many people. Pila ka mga batan-on ang ma-rape, mapatay, so at least na-stop nila ang pagsulod sa drugs. And more of this kind of operations should be initiated by the CIDG and PNP,” matod ni Baricuatro sa Lunes, Hulyo 7, 2025.
Sa Dominggo, unang nipadangat si Baricuatro sa iyang panawagan batok sa mga indibiduwal nga nalambigit sa ilegal nga drugas, kurapsyon, child pornography, human trafficking, illegal gambling, illegal quarrying, sand mining, ug uban pa nga hunongon na kining maong mga kalihukan o atubangon ang tukmang silot base sa balaod nga ilang nalapas. / ANV