Pipila ka mga dumadapig ug kaalyado ni kanhi Presidente Rodrigo Duterte pinangulohan ni Cebu gubernatorial candidate Pamela Baricuatro, nipadayag sa ilang suporta ug nahimo pa nga emosyonal nunot sa iyang pagkasikop tungod sa kasong crimes against humanity.
Sa laing bahin, ang mga progresibong grupo sa Sugbo nipahigayon og rally sa Fuente Osmeña Circle niadtong Martes sa hapon, nga nag-awhag sa kagamhanan sa Pilipinas nga paspasan ang pagbalhin ni Duterte sa kustodiya sa International Criminal Court (ICC) sa The Hague, Netherlands.
Gibutyag ni Baricuatro nga si Duterte nilupad na paingon sa The Hague, diin gikatakda niyang atubangon ang mga huwes sa ICC tungod sa mga pasangil sa extrajudicial killings atol sa iyang paglingkod isip presidente ug mayor.
“It is a sad day for all of us here. We are not here to cause trouble; we are here to express our sadness,” matod ni Baricuatro before the prayer rally.
Si kanhi Lapu-Lapu City mayor ug lone district Representative Paz Radaza nipadayag usab og suporta kang Duterte ug nag-post sa iyang Facebook page: “We stand with FPRRD.” / EHP