Human sa kusog nga uwan nga niresulta sa grabeng baha sa Cebu City niadtong Biyernes sa gabii, Agusto 15, nipagawas og assessment report si Konsehal Dave Tumulak, tsirman sa Cebu City Disaster Risk Reduction and Management Council (CCDRRMC).
Gitumbok niini ang mga kalig-on ug kakulangon sa flood-control system sa siyudad.
Matod ni Tumulak, maayo ang pagkatrabaho sa drainage systems sa pipila ka upland barangays, nga epektibong nagpaagos sa tubig-uwan padung sa mga sapa.
Apan iyang gibutyag nga ang pag-agos sa tubig paubos sa sapa delikado kaayo gawas kon dunay daling interbensyon.
Kusganon niyang girekomendar nga kawtan ang mga dagkong sapa aron molapad ang ilang kapasidad sa pagdala sa tubig ug mapugngan ang pag-awas sa umaabot nga mga bagyo.
Nisugyot ang konsehal og komprehensibo nga pamaagi sa pagdumala sa baha nga naghiusa sa structural measures sama sa pagpalapad, pag-dredge, ug pag-desilt sa mga sapa ug drainage channels.
Apil usab niini ang pagpalambo sa pakiglambigit sa komunidad ug estrikto nga pagpatuman sa environmental enforcement.
Iyang gitumbok nga ang mga ahensya sama sa Department of Public Works and Highways (DPWH), environmental offices, ug lokal nga gobiyerno kinahanglang adunay klaro nga mga tahas ug lig-on nga koordinasyon sa pagpatuman sa mga estratehiya.
Lakip sa mga importanteng lakang nga giila mao ang systematic nga pag-desilt sa mga kanal ug outfalls, pagpalapad sa mga chokepoint culverts, pagbutang og debris screens, ug estrikto nga iskedyul sa paglimpyo sa basura.
Gitug-an usab ni Tumulak ang panginahanglan sa upstream waste management campaigns, tungod kay ang mga barado nga agianan sa tubig makapasamot sa baha sa mga ubos nga lugar.
Gawas sa infrastructure, nanawagan siya alang sa mas lig-on nga community resilience.
Naglakip kini sa pagpalambo sa early warning systems, klaro nga mga plano sa pagbakwit, pagtudlo sa mga safe zone, ug mas estrikto nga land-use planning aron limitahan ang bag-ong development sa mga lugar nga prone sa baha.
Gidasig usab niya ang long-term nga mga paningkamot sa pagbalhin sa mga tawo sa mga high-risk nga lugar, kauban ang mga kampanya sa edukasyon bahin sa hustong paglabay sa basura ug pag-atiman sa drainage.