Gitinguha ni Dumanjug Mayor Guntranio “Gungun” Gica ang mas hugot nga pagpatuman sa mga silot batok sa mga poultry farm sa lungsod human sa reklamo sa publiko bahin sa daghang langaw.
Kini giingong tungod sa dili hustong paglabay sa iti sa manok sa Barangay Lawaan.
Sa interview sa SunStar Cebu kaniadtong Huwebes, Hunyo 19, 2025, gibutyag ni Mayor Gica nga human makadawat og reklamo bahin sa problema sa langaw, iya dayong gimando ang pagpahigayon og inspeksyon sa tanang poultry farm.
Gikonsiderar usab sa gobiyerno sa Dumanjug ang pagpanday og ordinansa nga magpahamtang og silot sa dili hustong paglabay sa iti sa manok.
Nitumaw ang isyu human usa ka residente ang nag-post sa iyang Facebook niadtong Huwebes, Hunyo 18 mahitungod sa problema.
Ang post naglakip og mga hulagway ug sketch sa gituohang tinubdan, nanawagan ug disinfection ug naghulagway sa lugar nga “grabi jud sa hugaw og baho.”
Lakip ang kasikbit nga barangay apiktado sa daghang mga langaw.
Gikompirmar ni Gica nga ang iyang buhatan nihimo na og aksyon sa reklamo.
“Gipabisita namo ang among sanitary inspector ug ubang hingtungdang buhatan sa lugar. Naghimo sila og mga rekomendasyon nga akong gi-post usab sa Facebook kaniadtong Hunyo 12,” matod sa mayor.
Gibutyag ni Gica nga duna na silay kasamtangang ordinansa nga nagpahamtang og silot sa mga kalapasan lakip na ang multa.
Sa una ug ikaduhang kalapasan , suspension ug pagpakanselar sa business permit, sa ikatulo adunay mga limitasyon ang kasamtangang mahimo sa lokal nga kagamhanan.
“Ang bag-o lang namo na discover, there is one poultry for him nga makadaginot, maka-save sa expenses sa paglabay sa iyang mga chicken drop, iyang gibutang didto sa open field nga wala mi kahibaw kinsay tag-iya sa yuta, bangag siya didto, gilabay niya ang mga iti,” pasabot ni Gica.
Pagbisita nila sa lugar, nasuta ni Gica nga ang tag-iya sa poultry farm naglabay og hugaw sa manok sa usa ka bukas nga luna sa yuta. Ang hugaw unta tabunan og yuta, apan giingong naguba ang backhoe sa tag-iya.
“Nidaghan ug samot ang iti tungod kay wala niya matabunan kay tungod kuno kay naguba ilang backhoe para tabon,” dugang niya.
Bag-ong Ordinansa
Tungod niini, nagplano ang kagamhanan sa pagpasar og bag-ong ordinansa nga specific magpahamtang og silot sa dili awtorisadong paglabay sa iti sa manok.
Gipasabot ni Gica nga ang silot alang sa kalapasan gitakda sa P2,000, tungod kay ang maximum allowable fine nga gi-regulate sa Provincial Government kay P2,500 ra.
Gusto unta niyang multahan og P2,500 matag kilo sa basura ang mga molapas sa balaod.
“Ang penalty ani is P2000 because ang maximum man gud natu nga penalty or fine kay regulated man ta by the Provincial Government is only P2,500, so ang atoa kay for every kilo fine na sila og P2,500 but now we could not do it so igo ra gyud mi-reprimand,” sumala niya.
Aksyon sa LGU
Gipasalig nga ang mga opisyal sa munisipyo—lakip ang bise-mayor, mga miyembro sa Sangguniang Bayan, Municipal Environment and Natural Resources Office, Municipal Disaster Risk Reduction and Management Office, sanitary ug agriculture offices, aktibong nagtubag sa isyu.
“We already have ordinances in place since 2016 when I became mayor, and these are continuously evolving,” dugang ni Gica.
Matod niya padayon pa ang mga inspeksyon, ug ang nagkalain-laing opisyal lakip na ang bise-mayor nibisita sa mga poultry site.
Dili usab makahatag si Gica sa gidaghanon sa poultry farm sa lungsod.
Ang Dumanjug usa ka lungsod sa Probinsya sa Sugbo nga nahimutang 73 ka kilometro habagatan-kasadpan sa Dakbayan sa Sugbo.
Ang lungsod nabantog sa ilang Bisayang Manok. / CDF