Nagmalampuson ang Sugbo uban sa paspas nga paglambo sa turismo, manufacturing, ug business process outsourcing nga nagpakita sa kalig-on niini sa pagbangon human sa pandemya.
Human sa paghinay sa 2020, nakabangon ang ekonomiya niini nga adunay tul-id nga mga rate sa pagtubo: 5.4% sa 2021, 5.0% sa 2022, ug 6.0% sa 2023. Sa 2023, naabot ang GDP sa Sugbo og P1.01 trilyon nga naglangkob sa 73% sa GDP sa Central Visayas.
Ang Dakbayan sa Lapu-Lapu mao ang nag-una sa 9.4% nga pagtubo, gisundan sa Dakbayan sa Sugbo sa 8.3%, ug Dakbayan sa Mandaue sa 7.3%, base sa PSA.
Ang turismo ug IT-BPM nagpabiling mga nag-unang hinungdan sa paglambo sa Sugbo. Sa 2024, nakadawat ang Sugbo og 5.94 milyon ka turista diin naka-generate og P38 bilyunes hangtod Septiyembre uban sa 10% nga pagtaas sa mga turista kumpara sa 2023. Ang Sugbo makabenepisyo sa gipanglantawan nga pagdaghan sa mga turista sa nasod ngadto sa 8.3 milyunes sa 2025, nga gipalig-on pinaagi sa mga pagpanindot sa Mactan-Cebu International Airport nga maoy major transit hub.
Samtang ang IT-BPM nga sektor nga adunay kapin sa 121,000 ka propesyonal nga trabahante ug nakakuha og $32.5 bilyon sa 2022. Uban sa kita nga moabot ug $38 bilyunes sa 2024, ang industriya nagpabiling malaumon alang sa 2025, tungod sa abilidad sa mga trabahante sa Sugbo ug ang imprastraktura nga andam sa negosyo bisan pa sa global nga kompetisyon ug pagtaas sa gastosan.
Ang Sugbo usa ka nag-unang IT-BPM hub gawas sa Metro Manila nga naghatag og high-quality nga mga opisina ug mas ubos nga gasto sa operasyon. Adunay 238,700 ka square meters nga magamit nga opisina diin nag-una ang Cebu I.T. Park, gisundan sa Cebu Business Park, fringe areas, ug Mactan. Duha ka bag-ong IT parks mao ang Mabolo IT Park ug Robinsons SRP IT Park diin modugang og 80,000 ka square meters sa umaabot nga mga tuig.
Ang Digital Cities 2025 roadmap nagtinguha nga himuon ang Sugbo ug uban pang mga siyudad isip mga unang destinasyon alang sa pamuhunan. Nagapadayon usab ang kalambuan sa residential market sa Sugbo diin ang mga dagkong developer nagplano ug mixed-use townships, vacation rentals, ug dagkong residential projects.
Gawas sa turismo ug IT-BPM, ang manufacturing usa ka importante nga sektor sa Sugbo nga naglangkob sa electronics, muwebles, pagkaon, ug barko. Ang estratehikong lokasyon, abilidad sa mga trabahante, ug competitive labor costs nagdani sa mga manufacturing investments apan nanginahanglan kini og stable nga suplay sa kuryente. Ang Sugbo nag-una sa Central Visayas sa manufacturing establishments ug export processing zones, ug nagsuporta sa paglambo sa MSMEs ug startups pinaagi sa buhi nga ekonomiya, mga inisyatiba sa gobiyerno, ug access sa financing.
Ang kalambuan sa ekonomiya sa Sugbo nagdepende sa stable ug barato nga suplay sa enerhiya. Ang power outage sa Panay Island sa Enero 2024 nagpakita sa risgo sa pagkawala sa enerhiya. Aron matubag kini, ang lokal nga gobiyerno ug negosyo sa Sugbo naghimog lakang aron mapaayo ang seguridad sa enerhiya uban sa panginahanglan sa dugang kapasidad ug transmission projects sama sa Cebu-Panay-Negros project.
“If we are to even be able to match the phenomenal growth that Cebu is experiencing right now, we would have to be serious in generating more capacity. That has become a focus and priority for me,” matod ni Governor Gwendolyn Garcia sa usa ka energy forum sa miaging tuig.
Gipalambo ang mga solar farms sa Daanbantayan, Dumanjug, ug Toledo aron matubag ang nagkadako nga panginahanglan sa enerhiya. Ang enerhiya nga imprastruktura sa Sugbo uban sa plano sa ikatulong unit sa Therma Visayas Inc. (TVI), magpalig-on sa long-term nga kalambuan ug magpaayo sa kalidad sa kinabuhi sa mga Cebuano.
Ang diversified nga ekonomiya sa Sugbo nga gipangulohan sa turismo, IT-BPM, ug manufacturing nagsiguro sa padayon nga kalampusan. / PR