Pagkahuman sa pila ka bulan nga puno sa hagit ug kawalay kasiguroan sa pagpangita og tarong nga panginabuhian, si Jocelyn Silaras, 39 anyos, nakabalik na gyud sa ilang balay sa Mandaue City, Cebu. Ang iyang panaw nga nagtimaan sa pakigbisog ug paningkamot, usa ka pamatuod sa gahum sa paglaum ug ikaduhang higayon.
Nausab ang kinabuhi ni Jocelyn pagkahuman mapakyas sa pagpangita og trabaho sa Metro Manila nga nisangpot sa kawalay kita ug balay. Tungod sa kakuwang sa kapuy-an, nipuyo siya sa barracks sa iyang igsuon apan dili siya tugutang magdugay tungod sa mga lagda sa kompanya.
Bisan pa sa walay puas niyang paningkamot sa pagpangita og trabaho, napadayon gihapon ang pagkasirado sa mga oportunidad ug nahurot na usab ang iyang natigom nga kwarta.
Sa dihang nibalhin ang iyang igsuon ngadto sa Palawan, si Jocelyn nabilin nga walay kapuy-an, napugos nga matulog sa kalsada diin pirme siyang nakuyawan alang sa iyang kaluwasan.
Tungod sa iyang tinguha nga mausab ang dagan sa iyang kinabuhi, nakakaplag si Jocelyn og paglaum pinaagi sa Pag-abot Program sa Department of Social Welfare and Development (DSWD) pinaagi sa Walang Gutom Kitchen, diin siya unang nakasinati og kasigurohan sa pagkaon.
Ang Pag-abot Program nagtumong sa paghatag og tabang ug paghaw-as sa mga kabus ug delikadong sektor sa katilingban, lakip na ang mga kabataan, mga pamilya, ug mga indibidwal nga nagapuyo sa kadalanan, pinaagi sa paghatag og essential social support ug mga interbensyon nga angay sa ilang panginahanglan. Ang maong inisyatibo naningkamot sab nga mapalambo ang kahimtang sa kinabuhi sa matag benepisyaryo aron sila mahatagan og gahum nga makalihok paingon sa usa ka lig-on, matinud-anon, ug produktibong kinabuhi.
Pinaagi sa Walang Gutom Kitchen, usa ka inisyatibo sa departamento nga naghatag og tabang sa pagkaon alang sa mga kabus ug delikadong sektor ilabi na ang mga walay puy-anan, nahibalo si Jocelyn nga posible diay nga makabalik siya sa ilang probinsiya uban sa hustong suporta. Uban sa ilang tabang, gihatagan siya og temporaryong kapuy-an samtang gihikay ang iyang mga papeles, giabagan sa pamlete, ug gitabangan nga makabalik pag-usab sa iyang pamilya.
Niadtong Marso 19, 2025, nisakay og eroplano si Jocelyn pabalik sa ilang lugar. Pag-abot niya, gihatod siya paingon sa Mandaue City diin mainiton siyang gidawat sa iyang 54 anyos nga live-in partner nga si Maximo Manabo ug sa ilang anak nga si Mj Silaras, 19. Ang ilang dugay nang gihandom nga pagkita pag-usab napuno sa mga gakos ug kalipay nga nagtimaan sa katapusan sa tulo ka bulan nga panagbulag ug kabalaka alang sa iyang kaluwasan ug panginabuhi.
Para kang Maximo, ang maong higayon usa ka dako nga kalipay. Nagpasalamat siya sa programa tungod sa tabang nga nakapahiusa pagbalik sa iyang pamilya.
Karon nga nabalik na si Jocelyn sa iyang balay, mag-agad pa siya sa dugang nga pagsusi sa DSWD 7 Regional Program Management Office nga team sa Pag-abot Program alang sa posibleng tabang sa panginabuhian isip kabahin sa ilang social protection package.
Ang maong tabang nagtumong sa pagtabang sa mga indibiduwal nga na-reintegrate aron mabalik ang ilang pinansyal nga kalig-on pinaagi sa paghatag kanila og mga kahinguhaan ug oportunidad aron magsugod og gamay nga negosyo o makakaplag og trabaho. Kon mapahimuslan, ang Pag-abot team magdumala sa pagpalit sa mga kinahanglanon nga butang ug materyales aron matuman ang ilang giaprubahang plano sa negosyo nga magtimaan sa usa pa ka milestones sa iyang panaw padulong sa usa ka independente ug siguradong kaugmaon.
Sa unang kwarter sa 2025, ang Pag-abot Program nakapabalik na og pito (7) ka benepisyaryo sa ilang tagsa-tagsa ka lokal nga kagamhanan sa Mabini ug Inabanga sa Bohol, uban usab sa pipila sa Asturias, Cebu City, Mandaue City, ug Toledo City sa Lalawigan sa Sugbo, ug sa Mabinay, Negros Oriental.
Ang tanang pito (7) ka benepisyaryo nakakumpleto na sa ilang mga dokumentaryong kinahanglanon alang sa ilang magamit nga mga social protection package ug sugdan na silang hatagan og ayuda sugod karong Abril 2025.
Ang Pag-abot Program nahimong hinungdanon para sa daghang tawo sama ni Jocelyn nga nagtanyag og tabang ug kahigayunan nga makasugod pag-usab nga dunay dignidad. Samtang nibalik siya sa kainit sa iyang pamilya, nagtan-aw si Jocelyn sa bag-ong pagsugod nga nasayod nga wa siya nag-inusara sa panaw. / PR