Nagkumboya og 80 puntos sila si Zach LaVine ug DeMar DeRozan aron agakon ang Sacramento Kings sa daog batok sa hosts Detriot Pistons, 127-117, ning Martes, Abril 8, 2025 (PH time), sa National Basketball Association (NBA).
Si LaVine nagpakatap og 43 puntos, 17 niini iyang gimugna sa 4th quarter, samtang si DeRozan nidugang og 37 puntos.
Nihatag og dakong suporta nila ni LaVine ug DeRozan mao si Domantas Sabonis, kinsa niamot og triple-double nga 19 puntos, 15 rebounds ug 10 assists.
Taliwala sa ilang pagkapilde, ang Pistons nagpabilin sa ikaunom nga puwesto sa Eastern Conference dala ang 43-36 nga rekord. Ang Pistons usa sa teams nga nakaseguro na’g puwesto sa playoffs.
Ning ilang daog, gipaburot sa Kings ang ilang paglaum nga makaseguro og puwesto sa play-in tournament sa Western Conference dala ang 39-40 nga rekord.
Nagkinahanglan na lang sila og usa ka daog sa katapusan nilang tulo ka mga duwa sa regular season aron malansang ang ilang luna sa play-in tournament isip No. 9 o No. 10 team, depende sa resulta sa ubang mga duwa.
Ang karibal na lang sa Kings sa inilugay sa No. 9 o No. 10 nga puwesto mao ang Dallas Mavericks (38-41) ug Phoenix Suns (35-43).
Kon makasinati bisan usa lang ka pilde ang Suns sa katapusan nilang upat ka mga duwa sa regular season, hayan makasulod na ang Kings sa play-in bisan unsa pa’y mahitabo sa nahabilin nilang mga duwa.
Human sa regular season, ang mopatigbabaw nga unom sa Eastern Conference ug Western Conference mao ang makaderetsog sulod sa playoffs samtang ang No. 7 hangtod No. 10 mao ang masulod sa play-in.
Sa play-in, magsangka ang No. 7 batok No. 8 samtang magparang ang No. 9 batok No. 10.
Ang modaog sa No. 7 batok No. 8 mosulod sa playoffs isip No. 7 samtang ang mapilde makigharong sa modaog sa No. 9 batok No. 10 aron ilugan ang No. 8 sa playoffs.
Ang mapilde sa No. 9 batok No. 10 sa play-in mosunod sa mga nanamilit og sayo. / AP, ESL