GIKUMPIRMAR ni Gobernador Pamela Baricuatro niadtong Lunes, Hulyo 7, 2025, nga gikonsiderar sa Kagamhanan sa Probinsiya sa Sugbo ang pagbalik sa manuwal nga sistema sa ticketing sa North ug South Bus Terminals tungod sa langan ug kalisod sa publiko sa kasamtangang automated nga setup.
Sa usa ka press conference nga gipahigayon sa Kapitolyo, si Baricuatro niingon nga ang kasamtangang ticketing nga gidumala sa Topline nakamugna og taas nga mga linya, ilabi na sa Cebu North Bus Terminal (CNBT) diin kasagaran duha ra ka automated booths ang abli.
“The system is inefficient. Most likely we will remove it after officially talking with Topline,” tug-an niya sa mga tigbalita.
Matod ni Baricuatro nga gisugyot ngadto sa mga nagdumala sa terminal ang pagbalik sa manuwal nga ticketing tungod sa padayon nga mga reklamo gikan sa mga sumasakay.
Giklaro sab niya nga ang Kapitolyo nagsusi sa kasamtangan nga mga kontrata niini sa Topline nga nag-operate sa mga ticketing kiosk, ug sa Mister Loo, ang premium restroom service provider sa CNBT.
Matod sa gobernador nga gipasaligan siya sa Provincial Treasurer’s Office nga ang pagbalik sa manuwal nga ticketing dili makaapekto sa koleksyon sa kita tungod kay ang kita sa terminal nag-una nga gikan sa entrance fees nga gikolekta gikan sa mga bus ug dili gikan sa automated nga sistema.
Sa isyu sa paggamit sa kasilyas, gisubli ni Baricuatro nga libre ang paggamit sa public comfort rooms, subay sa Executive Order No. 12, nga nagmando nga walay bayad paggamit sa regular nga public CRs sa mga terminal sa pro-binsiya.
Apan giangkon niya nga ang pagpatuman nagdepende sa legal nga probisyon sa kasamtangang kontrata sa Mister Loo.
“We are still looking into the legalities. If the contract does not allow public use, we will just build our own public toilet,” matod niya. / JPS