Malinawon ug hapsay ang una ug ikaduhang adlaw sa pagbukas sa klase sa tibuok Central Visayas nga way natala nga krimen ug problema subay sa gihimong monitoring sa Police Regional Office (PRO) 7.
Matod ni Police Brigadier General Redrico Maranan hepe sa kapulisan sa Central Visayas nga base sa ilang data nga nadawat adunay 3,010 ka mga publiko ug pribadong tunghaan sa tibuok rehiyon.
Moabot sab sa 7,366 ka mga police personnel ang gipakatap sa nagkadaiyang tunghaan alang sa gipatuman nga
Balik Eskwela operations lakip na ang mobile ug foot patrol officers nga gidestino sa palibot sa nagkadaiyang eskwelahan.
Nakamontar sab sila og 419 ka Police Assistance Desk (PAD's) sa sulod ug gawas sa campus sa mga tunghaan nga maoy duolon kon dunay motumaw nga problema sa mga tinun-an lakip na sa mga ginikanan.
"The peaceful and orderly opening of classes today is the result of our meticulous preparation and close coordination with schools, local government units, and partner agencies," matod ni Maranan.
Isip kabahin sa ilang proactive measures, ang kapulisan sa rehiyon padayon sa ilang dungan nga simulation exercise (SIMEX) aron pagsiguro ang kaandam ug dali nga pagtubag sa mga personnel kung dunay motumaw nga emergency.
Ang deployment sa tanang tunghaan magpadayon sulod sa tibuok tuig tingklase aron pabiling luwas ang tanang tinun-an.
Si Maranan personal nga ni-supervise sa iyang mga tawo nga naa sa karsada lakip na ang deployment sa ubang personnel aron kung dunay motumaw nga problema mahatagan dayon og solusyon. /AYB