Gimando ni Cebu City Mayor Raymond Alvin Garcia ang imbistigasyon sa pagpamaligya sa libreng ticket sa "Sinulog is Back" nga gipahigayon kagabii Enero 16, 2025.
Sa usa ka phone interview, gitahasan sa Mayor ang kapulisan nga moimbistigar aron ilhon kinsa kining mga ticket scalpers nga namaligya sa libreng tiket sa online.
Gimanduan sab niya si Konsehal Joel Garganera kinsa maoy overseer sa security cluster sa Sinulog Festival 2025 nga moimbistigar niini.
Matod ni Mayor Garcia nga angayan batunan sa kapulisan ug sa mga security personnel nga gitahasan sa kalihukan, ang pagpatuman sa maximum tolerance ngadto sa manan-aw sa concert.
Gitugtan sa Mayor ang kapulisan nga prisuhon ang mga manan-aw nga magpabadlong o manggubot.
Giklaro ni Garcia nga ang pagpanghatag og tiket gitumong aron makontrol ang crowd tungod kay limitado ang kapasidad sa Cebu City Sports Center (CCSC) nga maoy venue. Ang CCSC dunay seating capacity nga sobra sa 12,000 sa ilang mga bleachers. Giangkon ni Garcia nga ang gasto sa concert, sama sa talent fee gikan sa kaugalingon niyang bolsa.
Ang "Sinulog is Back" concert nag-feature sa mga top Filipino artist sama nila ni TJ Monterde, KZ Tandingan, ug Juan Karlo Labajo, Basilyo, Sisa, Crazy Mix, ug Eric Nicolas.
Niadtong Miyerkules Enero 15, 2025 daghan ang naglinya kasagaran mga estudyante didto sa CCSC aron pagpangayo sa libreng tiket sa concert. Apan pipila ka oras ang nilabay daghang online pages ug mga tawo nga nag-post og concert tickets for sale./EHP