Pagpamusil maora’g 'salida sa sine'

Pagpamusil maora’g 'salida sa sine'
(Google maps)

Ingon sa usa ka thrilling nga pelikula ang kaso sa pagpamusil sa lungsod sa Sibonga sa Biyernes sa gabii, Disyembre 22, apan sa Sabado sa kaadlawon na nataho sa kapulisan.

Ang biktima nga samdan nakaeskapo kay nakadagan, nakatago sulod sa pipila ka oras gikan sa suspek nga nagpunay sa pagpangita kaniya.

Buot unta siya’ng mangayo og panabang, apan mawala-wala ang signal sa iyang cell phone.

Ang biktima nga naluwas sa mga responder sa Municipal Disaster Risk Reduction and Management Office (MDRRRMO) sa lungsod sa Sibonga, habagatang Sugbo giila nga si Jomar Sarda, 37, ulitawo, taga sityo Tabon, Purok 6, Brgy. Tubod sa mao nga lungsod.

Samtang ang suspek giila nga si Tristan Mongado Padigos, alyas “Pangag Padigos,” 20, ulitawo, taga Sityo Banika, Brgy. Bahay sa samang lungsod.

Sa imbestigasyon sa kapuli­san sa Sibonga Police Station ubos sa kamanduan sa ilang hepe nga si Police Capt. Fort Anthony Valdez, nahitabo ang pagpamusil sa alas 10:35 sa gabii sa Biyernes, Disyembre 22.

Ang biktima ug suspek, uban sa mga higala, nagkasultihanay sulod sa purok house sa ilang dapit sa wa pa ang pagpamusil. Duol ra kini sa balay sa biktima.

Human niini, nisulod og balik sa ilang balay si Sarda, apan gi­sangpit siya ni Padigos busa ni­gawas siya og balik sa ilang balay.

Gipusil siya sa suspek ug naigo ang wala nga bukton.

Bisan samdan, nakahigayon pa pagdagan ang biktima ug nakatago sa balay sa ilang silingan samtang nagsunod kaniya si Padigos nga nagsige og pusil kaniya.

Nagsige og pangita ang suspek kaniya human kini nalipat taliwa sa kangitngit sa kagabhion.

Nilanat pa og dul-an sa lima ka oras una nakapangayo og tabang ang biktima kay way signal sa cell phone sa ilang dapit kay bukid.

Naluwas lang siya human nakapahibawo sa mga awtoridad ang iyang igsuon nga babaye. Ang kapulisan mga alas 3:05 na napahibawo sa hitabo.

Dali siya nga gidala sa usa ka tambalanan.

Usa sa mga anggulo nga gisubay sa kapulisan mao ang drugas, apan matod sa kapulisan nga way record ang biktima sa ilang buhatan nga nalambigit sa illegal drugs.

Nidumili usab pagsulti si Sarda kon nganong nasuko si Padigos kaniya.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph