Dili diay tulis ang motibo sa pagpusil-patay niadtong usa ka babaye sa dalan J.Luna corner Samar Loop sa Barrio Luz, Dakbayan sa Sugbo sa alas 10:30 sa buntag, Lunes, Abril 14, 2025.
Base sa imbestigasyon sa kapulisan, wala kuhaa ang bag sa biktima ug ang mahalon nga cellphone dihang gipusil siya sa mamumuno.
Unang gituohan nga tulis ang motibo sa pagpusil-patay niadtong babaye nga sakay sa ride hailing services.
Duna nay giila nga person of interest ang Cebu City Police Office (CCPO) sa nipusil ni Frince Ordeniza, 24, taga Sitio Calinao, Barangay Luz apan lumad nga taga Barangay Bahay, Lungsod sa Sibonga ug Store Head sa Open Source sa usa ka dakong mall sa South Road Property.
Matod ni Police Lieutenant Colonel Maria Theresa Macatangay, deputy city director for operation sa CCPO nga ila nang gipalapdan ang ilang imbestigasyon pinaagi sa pag-backtrack kon asa gikan ang mamumuno ug asa usab kini nipaingon human gihimo ang krimen.
Lakip sa gipasusi kon asa nagpuyo ang biktima ug asa usab siya nagtrabaho sanglit ilang nasayran nga dili kini taga Cebu City.
Sigon sa pamahayag sa saksi sa krimen nga samtang nag-stop signal sa dapit, ilang nakatapad ang mamumuno ug sa dihang ni-green na ang traffic light diha na kini nideklarar og tulis sa biktima ug dayong pamusil makatulo ka higayon.
Apan human sa pagpamusil gibiyaan ra siya sa mamumuno ug wala na kuhaa ang bag niini nga naa didto ang iyang mga butang sama sa cellphone ug iyang pitaka.
Ang mamumuno giingong nagsul-ob og puwa nga sweat shirt ug nakamotorsiklo og Yamaha NMAX base sa nakita nila sa CCTV ug pamahayag sa saksi.
Base sa ilang obserbasyon nga maantigo mogamit ang mamumuno og armas subay sa nakita nila sa CCTV.
Gibutyag ni Macatangay nga mopalawom sila sa ilang imbestigasyon tungod kay posibling dili tulis ang motibo sa krimen.
“Na-observe nato right before our eyes which is from the onset nakaingon tag robbery, no but we are tracking some angles nga naa say possibility nga maoy rason nga mao toy nahitabo,” matod ni Macatangay.
Nisaad na ang kabanay sa biktima nga makigtambayayong sa himuon nga imbestigasyon sa kapulisan.
Gikan sa usa ka sitio sa Barrio Luz ang biktima diin siya nag-boarding house ug nagpahatod sa iyang trabahuan pinaagi sa pag-book og ride hailing app apan pag-abot sa Samar Loop didto siya gipusil.
Ipaubos nila sa forensic examination ang cellphone sa biktima aron ilang masayran kon duna ba kini hulga sa kinabuhi sa wala pa mahitabo ang pagpamusil. / AYB