Ang conclave sa pagpili sa ika-267 nga Santo Papa magsugod sa Mayo 7, human matapos ang Novemdiales Masses sa pag-ampo alang sa walay katapusan nga kapahulayan ni anhing Pope Francis.
Ang mga kardinal sa Roma nagkasabot nga sugdan ang conclave sa Mayo 7, 2025.
Ang petsa gitakda sa Lunes sa buntag sa gibanabana nga 180 ka mga kardinal (sobra sa usa ka gatos kanila mga botante) nga nagtigom alang sa ikalima nga General Congregation sa Vatican.
Ang conclave mahitabo sa Sistine Chapel sa Vatican.
Unsa ang mahitabo sa panahon sa conclave?
Ang conclave pagasugdan sa usa ka solemne nga Eukaristiya nga selebrasyon uban sa votive Mass Pro Eligendo Romano Pontifice nga tambungan sa mga Cardinal electors.
Sa hapon, ang Cardinal electors mopadayon sa usa ka solemne nga prosesyon paingon sa Sistine Chapel diin ang Conclave magsugod sa pagpili sa bag-ong Santo Papa.
Pagkahuman sa prosesyon, ang matag Cardinal elector manumpa sumala sa gilatid sa paragraph 53 sa Universi Dominici Gregis.
Sila mopasalig, kon mapili, sa matinud-anong pagtuman sa Munus Petrinum isip Pastor sa Universal Church.
Mosaad sab sila nga ipadayon ang hingpit nga sekreto bahin sa tanan nga may kalabutan sa pagpili sa Santo Papa ug likayan ang pagsuporta sa bisan unsang pagsulay sa pagpanghilabot sa gawas sa eleksyon.
Niining puntoha, ang Master of Pontifical Liturgical Celebrations moproklamar ug extra omnes, nagpasabot nga ang tanang indibidwal nga dili bahin sa Conclave kinahanglang mobiya sa Sistine Chapel.
Ang master lamang ug ang eklesiastiko nga gitudlo sa paghatag sa ikaduhang pagpamalandong ang magpabilin.
Kini nga pagpamalandong nagpunting sa grabe nga responsibilidad nga sagubangon sa electors ug ang panginahanglan nga molihok subay sa putli nga katuyoan alang sa kaayohan sa Universal Church.
Kon mahatag na ang pamalandong, ang eklesiastiko ug ang Master of Pontifical Liturgical Celebrations mahimo na nga mobiya.
Mag-ampo na dayon ang mga Cardinal electors sumala sa Ordo Sacrorum Rituum Conclavis ug maminaw sa Cardinal Dean kinsa mangutana kon andam na ba sila sa pagpadayon sa pagbotar o kon adunay bisan unsang mga katin-awan bahin sa mga lagda ug pamaagi.
Ang tanan nga mga pamaagi sa eleksyon mahitabo lamang sa Sistine Chapel sulod sa Vatican Apostolic Palace nga magpabilin nga sirado hangtod mahuman ang eleksyon. /Vatican News