Pagproseso sa housing loan sa 93-1 nga lote, gilugwayan

Pagproseso sa housing loan sa 93-1 nga lote, gilugwayan
SunStar Local News GPX

Moabot sa 44 ka mga homeowners’ association nga kasamtangang nag-okupar sa 93-1 nga lote sa Cebu Provincial Government ang gihatagan og 60 ka adlaw, o hangtod sa Hulyo 2, 2024, nga makakuha og housing loan gikan sa Pag-ibig.

Sa pakigtagbo ni Gobernador Gwendolyn Garcia niadtong Huwebes, Mayo 2, 2024, nakahukom siya nga lugwayan ang deadline, nga ni-expire niadtong Huwebes, aron mahatagan sila og dugang panahon sa pagproseso sa ilang mga dokumento, nga naglakip sa mga rekisitos sama sa tax declaration ug tax clearance.

Ang tigom gitambungan nila ni Cebu City Vice Mayor Raymond Garcia, Provincial Legal Officer Donato Villa ug Miram Loren, housing relationship officer sa Pag-ibig.

Gipasaligan ni Garcia ang representante sa Pag-ibig nga ang Probinsya moisyu og mga certification nga nagkanayon nga ang mga lote nga gikuwestiyon gipanag-iya sa Probinsya ug ubos sa usa ka tax declaration.

“Ayaw na mo (Pag-ibig) og pangayo og tax clearance, kay unsaon man nila? Unsaon pag-issue sa assessors og tax clearance kon wala sila’s tax declaration? Unsaon nila pagbayad? Unsaon pag-issue nga wala man, kay pangan man ni sa Province,” matod niya sa meeting nga gi-stream live sa official social media arm sa Provincial Government.

Gipirmahan usab sa gobernador ang plano sa subdivision aron madeterminar ang pagbahin sa mga lote sa mga tag-iya sa balay.

Ang mga okupante ningpadayag sa mga hagit sa pagsulay sa pagkuha sa usa ka aprubadong subdivision plan gikan sa Cebu City Planning and Development Office tungod sa kaduol sa mga balay ug sa pig-ot nga mga dalan, nga naghimo sa mga lugar nga peligro sa sunog.

Kinahanglan nila nga makakuha og barato nga financing loan sa Pag-ibig aron makapalit sila sa mga lote nga ilang giokupar.

Apan, ang mga tag-iya sa balay nga nag-okupar sa mga lote nga 28 square meters o ubos pa giawhag nga direktang mobayad sa Provincial Government base sa appraisal, tungod kay ang Pag-ibig wala manghatag og loan sa mga lote nga 28 square meters o ubos pa.

Kon ang mga tag-iya sa balay dili makabayad og diretso sa Kapitolyo, gisugyot atol sa tigom nga makigsabot sila sa ilang silingan ug i-consolidate ang ilang mga lote alang sa usa ka loan application.

Ang mga tag-iya sa balay kasamtangang nag-okupar sa hiniusang 51 ka ektarya nga yuta nga gipanag-iya sa Kagamhanan sa Probinsiya nga nagkatag sa Barangay Busay, Luz, Lahug, Mabolo, Apas, Lorega, Kasambagan, Capitol Site, Tejero, Kamputhaw ug Kalunasan sa dakbayan sa Sugbo.

KASAYSAYAN

Ang Ordinance 93-1, nga gipasar sa Provincial Board niadtong 1993, nagtugot sa mga residente sa dakbayan sa Sugbo nga makapanag-iya sa mga lote sa Probinsiya nga ilang giokupar human mabayri ang tibuok amortization sa property sulod sa duha ka tuig. Gihatag ang 10 ka tuig nga extension sa 93-1 nga mga okupante, apan ang panahon nilapas sa 2004.

Ang mga paningkamot alang sa usa ka land swap tali sa Kapitolyo ug City Hall gisugdan niadtong 2006 aron matubag ang kahimtang sa mga nagpuyo sa lote, apan wala ma­hitabo ang maong plano. / EHP

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph