Nangabalaka ang mga netizen ug mga residente nga nagpuyo duol sa Alviola St. sa Barangay Tejero, dakbayan sa Sugbo, sa kalit nga pagkausab sa kanhi naglugitom nga tubig sa Tejero Creek ngadto sa puti nga kolor niadtong Sabado, Abril 6.
Ang kalit nga pagkausab nakapukaw sa kahadlok sa mga residente sa posibleng peligroso nga paglabay sa kemikal sa sapa.
Ang panghitabo sa puti nga kolor sa tubig nagagikan sa luyo sa karaang White Gold House hangtod sa Tejero barangay hall sa dalan Alviola ug T. Padilla.
Gi-post sa SunStar Cebu sa social media ang pipila ka natampo nga mga hulagway nga nagpakita sa kahimtang karon sa Tejero Creek niadtong Sabado. Ang SunStar Cebu ni-post usab og laing set sa mga hulagway sa Dominggo, Abril 7, nga nagpakita nga walay kalamboan sa kahimtang sa tubig sa sapa. Ang SunStar Cebu niadtong Sabado, Abril 6 nakig-alayon sa Cebu City Environmental Sanitation and Enforcement Team (CESET).
INSPEKSYON
Sa pakigbayloay og mensahe sa chat sa samang adlaw, ang pangulo sa CESET nga si Grace Luardo niangkon nga wa sila kahibawo sa sitwasyon kon wala sila pangutan-a sa SunStar Cebu. Nipadala siya og usa ka grupo aron sa pagsusi sa sapa.
“Pwede naay nagyabo chemicals or human activities diha sa area,” matod ni Luardo.
Human sa inspeksyon, si Luardo nitug-an sa SunStar Cebu nga ang nahitabo tungod sa dili maayo nga drainage system sa Mactan Rock Industries Inc., usa sa bulk water suppliers sa Metropolitan Cebu Water District.
Siya niingon nga ni-isyu sila og citation ticket niadtong Sabado sa hapon ngadto sa Mactan Rock Industries Inc. tungod sa paglapas sa City Ordinance 2398, nga may kalabotan sa walay septic tank ug saktong drainage.
Si Luardo niingon nga kinahanglang mobayad ang kompaniya og penalty nga P2,000 sulod sa pito ka adlaw nga trabaho sa Cebu City Environment and Natural Resources Office (Ccenro). Sa pakighinabi sa telepono sa Dominggo, Abril 7, si Antonio Tompar, usa sa mga tag-iya sa Mactan Rock, nihimakak nga ang maong panghitabo tungod sa ilang desalination facility sa dapit.
“Kanang puti, dili na amoa. Tin-aw nga tubig ang among gi-discharge bisan pa og tan-awon ninyo... ” matod niya sa SunStar Cebu. Ilang atubangon kon madawat na ang citation ticket. / AML, WBS