Ipatawag sa konseho sa Siyudad sa Mandaue ang Mandaue City Police Office-Traffic Enforcement Unit (MCPO-TEU) aron mopatin-aw sa basehanan sa pagpriso sa mga drayber nga malambigit sa aksidente sa sakyanan nga moresulta sa pagkaangol o kamatayon.
Kini subay sa resolusyon nga gisang-at ni Konsehal Carlo Pontico Fortuna atol sa sesyon sa konseho niadtong Lunes, Hulyo 14, 2025.
Sa usa ka interbyu , gikutlo ni Fortuna ang mga taho nga ang mga drayber sa gitawag nga “offending vehicles” diha-diha dayon prisuhon sa kapulisan, bisan pa kon dili kini ang nakasala sa insidente.
“Nakita nako sa mga report sa media nga ang mga sakyanan nga nabanggaan ang ending ang drayber ang ma-detain, bisan pa kon ang pikas nga partido ang hinungdan sa aksidente. Mao na nga kinahanglan nato klaruhon kon unsa gyud ang ilang polisiya,” matod ni Fortuna.
Namatikdan ni Fortuna nga sa pipila ka kaso, ang drayber nga nabanggaan, dili ang nakasala ang napriso.
Matod niya nga base sa kasamtangan nga pamaagi sa trapiko, ang usa ka tawo kasagaran ibutang sa kustodiya kon ang usa ka aksidente moresulta sa pagkaangol o kamatayon. Sa daghang insidente sa trapiko nga naglambigit og motorsiklo ug pribadong sakyanan, ang drayber sa upat ka ligid nga sakyanan sagad maoy prisuhon.
“Kasagaran, kon motorsiklo ug sakyanan ang nalambigit, ug kanang nagmotorsiklo mamatay, ang drayber sa sakyanan ang ma-detain. Apan makatarunganon ba kana kanunay? Kinahanglan natong balikon kana nga polisiya, kon aduna gyud,” ingon niya.
Iyang gipasabot nga angayang i-review ang maong polisiya tungod kay dili makiangayon nga prisuhon ang wala makasala. / CAV