GIPASIGARBO ni outgoing-Vice Mayor Nerissa Ruiz ang mga kalampusan sa konseho, ilabi na ang pagmugna og plantilla positions sa dugay nang nagserbisyo nga mga job order (JO) workers.
Lakip na niini ang pagpasar sa Environment Code sa siyudad nunot sa nagkaduol na nga pagtapos sa termino sa ika-16 nga Sangguaning Panlungsod sa Mandaue.
Sa usa ka interview niadtong Lunes, Hunyo 23, 2025, si Ruiz niingon nga daghan sa mga JO employee ang dugay nang nagserbisyo sa siyudad nga walay benepisyo ug ang pagtubag niini pinaagi sa paghimo og plantilla.
Gihulagway sab niya ang Environment Code isip usa ka landmark legislation nga makatabang sa paghulma sa long-term environmental ug sustainability policies sa siyudad.
Ang katapusang sesyon sa outgoing council gitakda sa Lunes, Hunyo 30, uban sa bag-ong napili nga mga opisyal sa siyudad nga gipaabot nga motambong, subay sa mando sa Department of the Interior and Local Government (DILG).
Ang opisyal nga turnover sa mga opisina tali sa outgoing ug incoming officials mahitabo sab sa samang adlaw.
Giila ni Ruiz nga ang proseso sa paghimo og balaod kanunay nagdepende sa kusog sa mga political blocs.
Matod niya nga gilauman nga ang mayoriya nga kaalyado sa kampo ni kanhi Mayor Jonas Cortes maoy makakita sa kadaghanan sa ilang mga balaod nga mapasar.
Bisan tuod kabahin siya sa minoriya, giila ni Ruiz ang kaayo sa mga ordinansa nga giaprobahan sa mayoriya nga gihulagway niyang makahatag og benepisyo sa siyudad.
Tungod kay nabahin na man sa patas ang gidaghanon sa mga sakop sa konseho, nagtuo si Ruiz nga mas lawom nga mga deliberasyon ang mahitabo sa pagpasar sa mga ordinansa.
“Healthy discussions will definitely be more intense now that both side have equal representation but what matters most is working together for the good of the Mandauehanons,” matod niya.
Gidasig niya ang sunod nga mga opisyal nga magtinabangay ug dili lang magtutok sa mga political alignments ug hinumdoman nga ang paghimo og balaod kinahanglan buhaton alang sa kaayuhan sa mga Mandauehanon.
Si incoming-Bise Mayor Glenn Bercede nga maoy molingkod isip presiding officer sa bag-ong Sangguniang Panlungsod, nipadayag sa iyang intensyon nga palambuon ang usa ka himsog ug maayong relasyon sa mga umaabot nga sakop sa konseho.
Gipaabot niya ang malinawong mga sesyon taliwa unya sa mga debate ug panagsumpaki nga usa ka natural nga bahin sa bisan unsang legislative body.
Namalandong sab si Bercede sa iyang hamubo nga paglingkod isip acting mayor ug niingon nga ang kasinatian nakahatag kaniya og mas lawom nga paghatag og gibug-aton sa posisyon.
“Being mayor is no easy task. There’s immense pressure and responsibility. It made me realize just how big a sacrifice it is to serve in the capacity,” matod niya.
Samtang nangandam sa paglingkod sa iyang bag-ong posisyon, matod ni Bercede nga tutokan niya ang pagtabang sa paghimo og maayo ug people-centered nga mga polisiya.
Iya sab himuong magkahiusa ang executive ug legislative branches sa gobiyerno.
Ang tanang bag-ong napili nga opisyal sa Mandaue City gitakda nga nga molingkod sa katungdanan sa udto sa Hunyo 30, 2025. / CAV