Gipasabot sa pangulo sa Commission on Elections (Comelec) nga gidili ang pagsuspenso sa mga opisyal sulod sa 45 ka adlaw nga campaign period kon way pagtugot kanila.
“First, all suspensions imposed at the start of the campaign period, 45 days before the election, cannot be implemented without permission from the Commission on Elections,” matod ni Comelec Chairman George Garcia sa interview sa dzRH.
Kini may labot sa unom ka buwan nga preventive suspensio batok ni Gobernador Gwendolyn Garcia.
“However, there is one exemption, and that is when the suspension is implemented by the Office of the Ombudsman related to the Anti-Graft and Corrupt Practices Act, which is Republic Act 3019,” dugang niya.
Matod sa Comelec nga ang Ombudsman kinahanglan nga mangayo una og exemption kon ang rason sa pagsuspenso dili tungod sa reklamong graft.
Ang pamahayag ni chairman Garcia gi-post sa official online platform sa kapitolyo.
Mao sab kini ang argumento sa mga abugado ni gobernador Garcia nga nitumbok sa Section 261 sa Omnibus Election Code nga kinahanglan una ang pagtugot sa Comelec sa dili pa makasuspenso sa mga opisyal atol sa election period.
Ang legal team sa gobernador gilangkuban nila ni Atty. Alex Avisado Jr., Capitol Environmental Concern Consultant Ben Cabrido ug Legal Consultant Rory Jone Sepulveda nga nitambag sa opisyal nga dili manaog sa kapitolyo samtang kuwestyunon ang kamanduan sa Ombudsman.
Ang pagsuspenso sa gobernador gimando niadtong Martes, duha ka semana sa dili pa ang May 12 midterm elections nga si Garcia magpapili sa iyang ikatulong termino. / EHP