Nakamugna og pakaungot sa dagan sa trapiko ang pagsuway sa roundabout sa UN Avenue intersection sa Dakbayan sa Mandaue.
Ang roundabout system simulation sa Plaridel Street ug UN Avenue intersection sa Mandaue City gitangtang sa gibana-bana mga alas 8:30 sa buntag sa Lunes, Abril 15, 2024. Mga obserbasyon nagpakita nga ang dagan sa trapiko nibalik sa naandang kahimtang.
Kini nga karsada giila nga labing baga sa trapiko sa Mandaue city, diin ang intersection sa UN Avenue nagsilbi nga nag-unang access point sa mga biyahidor padulong ug gikan sa Isla sa Mactan pinaagi sa Marcelo Fernan Bridge.
Pagkahuman sa dry run sa Dominggo, ang ideya sa pagpatuman sa usa ka roundabout gisugat sa pagsupak tungod kay kini ang hinungdan sa gridlock, daghan nangatanggong sa grabe nga bumper-to-bumper nga trapiko.
Si Ralph, 43, usa ka food delivery rider, supak sa roundabout simulation kay makasamot kini sa trapiko ug makalangan sa iyang paghatod, ilabi na sa naglagiting nga kainit kon mopaingon sa Lapu-Lapu City.
Nagtuo siya nga dili maayo ang pagbutang og roundabout sa gamay nga karsada gawas kon kini gipalapdan.
“Imbis traffic na daan diri, mas nisamot ang ka traffic tungod sa rotunda. Magbulad pa mig pila ka minuto sa init usa modagan ang flow sa traffic”, matod niya.
Si Rey Bacaling, 21, nipadayag sa iyang opinyon nga iyang suportahan ang ideya sa maong proyekto kay makamenos kini sa kahuot, apan nagkinahanglan kini og mas strategic planning.
“Sa akong huna-huna ang simulation adunay potensyal nga makatabang pag-ayo sa trapiko apan sa pagkakaron nakakuha kini usa ka lugar sa dalan nga hinungdan sa daghang trapiko”, ingon niya.
Sa report sa Sugbo News Facebook page, Dominggo, Abril 14, 2024, plano sa Probinsiya nga pauswagon ang roundabout system pinaagi sa pagpalapad sa mga dalan ug pagbalhin sa lingin paingon sa D.M. Cortes St.
Ang mga dalan palapdan aron ma-accommodate ang mas dako nga roundabout, kauban ang maayo nga info drive ug pagbutang sa daghang mga karatula.
Tumong niini nga sa di pa mahitabo, magiyahan ang mga motorista sa pagpili sa lane, nga mamenosan ang kahuot sa intersection. / CAV