Sugdan ning Pebrero ang pagpadayon sa vertical ug horizontal development sa napulo ka andana nga Cebu City Medical Center (CCMC) aron makab-ot ang tumong nga 500-bed capacity.
Sa pakighinabi sa telepono sa Miyerkules, Enero 31, 2024, si Dr. Peter Mancao, CCMC medical director, niingon nga ang bag-ong CCMC naa pa lang sa 180 ka bed capacity kay tulo pa lang ka andana ang kasamtangang nagamit .
Si Mancao niingon nga ang ginagmay nga mga kausaban sa orihinal nga plano gihimo aron unahon ang pagdugang og dugang mga ward kay sa pribadong mga lawak.
Siya niingon nga ang ikawalo, siyam, ug ikanapulo nga andana gamiton isip wards.
Ang vertical nga pagtrabaho maglangkob sa ikawalo, ikasiyam, ug ikanapulo nga andana sa edipisyo.
Samtang ang horizontal nga trabaho naglakip sa pagsangkap sa nahuman nga mga andana, lakip ang ikaupat, ikalima, ikaunom, ug ikapito’ng andana.
Matod ni Mancao, ang ikaupat nga andana mao ang operating room ug delivery room complex, ang ikalimang andana alang sa mga pasilidad sa Pediatric intensive care unit (ICU) ug ICU, ang ikaunom nga andana alang sa Administration functions, ug ang ikapitong andana gipahinungod sa Operation Smile ug Eye Institute.
Unang nang nipadayag si Mayor Michael Rama nga siya mangita og P1 bilyunes gikan sa mga donasyon alang sa paghuman og trabaho sa CCMC nga wa nay gasto ang Siyudad.