Mayoriya sa mga sakop sa Cebu City Council ningbotar sa pagsuspenso sa civil works sa ikaduha ngadto sa ikaupat nga pakete sa Cebu Bus Rapid Transit (CBRT) sulod sa unom ka buwan.
Niawhag usab sila kang Cebu City Mayor Michael Rama nga magtigom og CBRT technical working group aron susihon ang posibilidad sa pagpahigayon og city-operated trial run sa rota sa CBRT gikan sa Bulacao paingon sa Ayala atol sa suspension.
Si Cebu City Councilor James Anthony Cuenco, transportation committee chair, nihatag og privilege speech atol sa regular session niadtong Miyerkules, Abril 16, 2024, nga nagduso sa nahisgutang mga lakang ug pagpaila sa mga sugyot sa mass transportation expert ug consultant Rene Santiago ug urban planner Nigel Paul Villarete palibot sa mga operasyon sa CBRT.
Matod ni Cuenco atol sa executive session niadtong Abril 3, sila si Santiago ug Villarete ningsugyot nga ang Package 1 unta ipatuman sa laing dapit, inay sa Osmeña Boulevard.
Ang ilang rason naglakip sa hamubo nga gitas-on sa rota sa CBRT gikan sa Cebu South Bus Terminal paingon sa Kapitolyo, ang presensya sa daghang crosswalk sa rota, ug ang posibilidad sa mas simple nga mga disenyo sa BRT station aron makadaginot sa oras ug kuwarta.
Ang duha ka mga eksperto sa trapiko niingon usab nga ang kasamtangang mga rota sa BRT nag-una nga nagkonektar sa mga sentro sa komersyo sama sa Ayala Mall ug IT Park, imbes nga mga lugar nga residential, sibo sa orihinal nga katuyoan.
Ila usab nga gikuwestiyon ang pagpangayo og depot sa South Road Properties (SRP), nga ilang giklaro nga wa mahisubay sa orihinal nga katuyoan sa BRT.
Gisugyot hinuon nila nga ikonsiderar ang alternatibong rota agi sa Fuente Osmeña paingon sa General Maxilom kon gusto sa publiko nga maglikay sa Kapitolyo.
Sa pagkonsiderar sa opinyon sa duha ka traffic experts, gisuportahan ni Cuenco ang sugyot ni Santiago kinsa misugyot sa paghimo og dry run sa Bulacao ngadto sa Ayala Route, pagpatuman sa mga exclusive bus lanes nga walay pag-ayo sa mga dalan, ug paggamit sa temporaryo ug/o cost-effective nga mga bus station. / AML