Bacolor, Pampanga — Ilawom sa usa ka bungtod nga daw bodega tan-awon, nagtago ang usa sa labing talagsaong simbahan sa Pilipinas: ang Underground Shrine ni Our Lady of Lourdes sa Barangay Cabetican, Bacolor. Sa unang tan-aw, mura ra kini og abandonadong estruktura, apan kini usa ka balaan ug hilom nga dapit nga gitukod gikan sa kasakit ug paglaom.
Human sa pagbuto sa Mount Pinatubo niadtong 1991, nalubong sa lahar ang kadaghanan sa Bacolor, lakip na ang mga simbahan ug kabalayan. Apan ang mga deboto sa Cabetican wala mawad-i sa ilang paglaom. Ilang gitukod ang usa ka bag-ong simbahan nga partially underground nga nagsimbolo sa ilang kalig-on ug pagtuo.
Pagsulod sa shrine, imong mabati ang kabugnaw ug kahilom sa sulod. Sa altar makita ang hulagway ni Our Lady of Lourdes nga gibutang sa usa ka grotto-style setting nga napalibutan sa bato ug tanom. Ang kasanag ug kahilom sa palibot naghatag og espirituwal nga kahulugan ug kalinaw.
Ang katalagsaon sa maong shrine dili lang sa iyang porma apan sa iyang kasaysayan. Kini nagpamatuod sa walay puas nga pagtuo sa mga Bacoleño, bisan human malubong sa abo, ilang napadayon ang ilang pag-ampo ug pag-alagad sa Ginuo. Usa kini ka lugar nga gibisitahan alang sa pag-ampo, pagpangayo og kaayuhan, ug pagpasalamat.
Abli ang Shrine of Our Lady of Lourdes matag adlaw ug gidagsa sa mga deboto ilabina sa mga buwan sa Birhen ug adlaw sa pista. Kon nangita ka og espirituwal nga destinasyon sa Pampanga, kini nga shrine usa ka pahimangno nga bisan sa ilawom sa mga pagsulay, magpadayon ang pagtuo. /