Mga duwa karon:
5:00 pm- Rain or Shine batok Terrafirma
7:30 pm- Phoenix batok NorthPort
Mas paamagon og suway sa Rain or Shine Elasto Painters ang ilang paglaom nga makabaton og puwesto sa Top 4 sa ilang pagpakigbatok sa nagkagidlay nga Terrafirma Dyip sa premirong duwa karong Miyerkules sa hapon, Hunyo 4, 2025, sa Philippine Basketball Association (PBA) Season 49 Philippine Cup sa Philsports Arena.
Ang Elasto Painters nga aduna pa’y nahabiling tulo ka mga duwa sa elimination round, kasamtangang naa sa ikaunom nga puwesto sa team standings dala ang 5-3 nga rekord.
Dako pa kaayo ang kahigayunan sa Elasto Painters nga makasulod sa Top 4 nga nagtangag og twice-to-beat nga benepisyo sa nagkaduol nga quarter-finals.
Apan aduna’y kalbaryo nga kinahanglang pas-anon ang Elasto Painters gumikan sa pagkaangol sa usa sa ilang mga haligi nga si Felix Lemetti.
“Maganda inilalaro niya (Lemetti), kahit sa practice, tapos na-fracture pa kamay. At least six weeks out kaya out for the season na siya,” matod ni Elasto Painters coach Yeng Guiao nga napatik sa www.pba.ph.
Taliwala niini, ang Elasto Painters nagpabiling inilog batok sa Dyip nga nagbitay sa labing ubos nga puwesto dala ang 1-8 nga rekord ug usa sa upat ka teams nga wala na’y purohan nga makaabot sa quarter-finals.
Nagkanayon si Guiao nga iyang gipahimangnuan ang iyang mga batos nga dili molugak bisan gamay.
“Any time you step on a basketball court with another team you always have a chance of losing. Minsan maliit lang iyung chance pero nangyayari pa rin. We have to be careful of that,” batbat ni Guiao.
Sa main game, magsangka ang parehong wala na sab paglaum nga makaabante nga mao ang Phoenix super LPG Fuel Masters ug NorthPort Batang Pier.
Ang Fuel Masters adunay 2-7 nga rekord samtang ang Batang Pier adunay 1-7 nga baraha. (ESL)