Gibaraw sa Rain or Shine Elasto Painters ang pagbalik ni Justin Brownlee sa Barangay Ginebra Gin Kings, 73-64, sa Philippine Basketball Association (PBA) Governor’s Cup, Sabado sa gabii, Agusto 24, didto sa Candon City Arena, Candon, Ilocos Sur.
Ang E-Painters mipabuhagay og 21-12 run sa uwahing hugna aron tumbahon ang fan-favorite Gin Kings ug kuhaon ang ikaduhang kadaogan sa conference.
Si Aaron Fuller mipakatap og 16 puntos, midugang si Andrei Caracut og 14 ug miamot ang rookie nga si Felix Lemetti og 13 sa Rain or Shine sa usa ka low-scoring nga kombati.
Ang Ginebra misandig kang Japeth Aguilar nga dunay 20 puntos, samtang ang giatngan nga si Justin Brownlee, nalimitahan ngadto sa 18 puntos.
Ang naturalized Pinoy nga si Brownlee maoy mialsa sa Team PH sa international competitions sa Southeast Asian Games sa Cambodia, sa Asian Games didto sa Hangzhou, China ug ang kulbahinam nga Olympic Qualifying Tournament sa Latvia.
Ang Rookie of the Year nga si Stephen Holt, kinsa nakuha sa Ginebra pinaagi sa trade, mikamada og 13 puntos sa iyang unang duwa sul-ob ang Gin Kings uniform.
Si Lemetti ug Fuller maoy midala sa ROS ngadto sa kadaogan pinaagi sa ilang timely shots sa hinapos nga bahin sa duwa nga maoy mimansa sa pagbalik ni Brownlee sa PBA sukad April 2023.
Puntos matag usa:
Rain or Shine (73) – Fuller 16, Caracut 14, Lemetti 13, Mamuyac 9, Tiongson 5, Clarito 4, Belga 3, Ildefonso 3, Santillan 2, Nocum 2, Datu 2.
Ginebra (64) – J. Aguilar 20, Brownlee 18, Holt 13, Ahanmisi 5, Thompson 4, Go 2, Abarrientos 2. / RSC