Mga duwa karon:
5:00 pm- Meralco batok Blackwater
7:30 pm- Rain or Shine batok TNT
Magpinaksitay ang duha sa labing init nga teams nga mao ang Rain or Shine Elasto Painters ug TNT Tropang 5G sa main game karong Miyerkules sa gabii, Mayo 21, 2025, sa Philippine Basketball Association (PBA) Season 49 Philippine Cup sa Ynares Center sa Antipolo City.
Ang Elasto Painters, nga adunay 4-2 nga rekord ug nakigbahin sa Brgy. Ginebra Gin Kings sa ikaupat nga puwesto, mosuway pagposte sa ikatulo nilang sunodsunod nga kadaugan.
Sa labing ulahi nilang duwa, gipayukbo sa Elasto Painters ang league-leader Magnolia Chicken Timplados Hotshots, 119-105, niadtong Dominggo, Mayo 18.
Sa ilang bahin, ang Tropang 5G, nga adunay 3-3 nga rekord, mosuway pagposte sa ikaupat nilang sunodsunod nga kadaugan.
Human sa ngil-ad nilang pagsugod sa komperensya diin nasagunsonan sila og tulo ka mga pilde, ang Tropang 5G ningbawi ug gipangpukan ang nagsunod nilang tulo ka mga kontra.
Ang nakaapan lang ning higayuna, posibleng mokombati ang Tropang 5G nga wala ang usa sa ilang mga sinaligan nga si Rey Nambatac, kinsa adunay gipamati sa lawas.
“Rey is a huge part of our team, he does so many things for us. His sidelining is another challenge for us moving forward,” matod ni TNT coach Chot Reyes nga napatik sa www.pba.ph.
Taliwala niini, aduna gihapon igong kapabilidad ang Tropang Giga sa pag-alkontra sa puwersa sa Elasto Painters.
Sa premirong duwa, makigsangka ang Meralco Bolts sa nagsalimoang nga Blackwater Bossing.
Ang Bolts adunay 3-5 nga rekord samtang ang Bossing nagbitbit og 1-4 nga rekord. / ESL