Kapin sa 100 ka runners lakip na niini ang prominenteng mga personalidad sa Cebu running circuit ang nakaparehistro na sa 2024 Cebu Press Freedom Week (CPFW) Fun Run, nga gikatakda karong Septiyembre 15, 2024 sa Robinsons Galleria Cebu.
Lakip sa mga nagparehistro na mao si Asia Paraase, kinsa nagmalampuson sa niaging Palarong Pambansa.
Si Paraase, kinsa lumad nga taga Lapu-Lapu City, modagan sa women’s 5-kilometer category sa lumba nga gipasiugdahan sa Cebu Federation of Beat Journalists.
Sa niaging Palaro, si Paraase nihimo’g grabeng langas dihang nahimo siyang labing unang nakadaog og gold medal sa kompetisyon gikan sa 3,000-meter run. Nakabaton og laing gold medal si Paraase sa 1,500-meter run.
Nagparehistro na sab ang beteranong marathoner nga si Prince Joey Lee, kinsa mopakita’g aksyon sa men’s 10K event.
Gawas sa 10K ug 5K, ang CPFW Fun Run aduna sab 3K category.
Karong Septiyembre 8 ang deadline sa rehistrasyon.
Kapin sa P50,000 ang kinatibuk-an ganti sa lumba.
“Atong gi-invite ang tanang running ug fitness enthusiasts nga magpa-register aning run for a cause. Manghatag ta og cash prizes sa top finishers ug naa sab ta’y exciting raffle prizes,” matod ni CFBJ president Arnold Bustamante.
Alang sa interesado pa nga magparehistro, mahimong mobisita sa Facebook page sa CFBJ ug hasta sa opisina sa radio station dyHP ug Manila Bulletin-Cebu. / ESL