Gipasa na ngadto sa Agusan del Sur ang hosting rights para sa 2026 Palarong Pambansa, human sa malampuson nga pagpahigayon didto sa Ilocos Norte.
Ang Agusan del Sur mo-host sa ilang unang Palarong Pambansa nga mao pud ang ika-66 nga edisyon sa national sporting meet.
Atol sa closing ceremony, gihatag ni Ilocos Norte Governor Matthew Manotoc ang bandila sa Palarong Pambansa ngadto kang Agusan del Sur Governor Santiago Barriga Cane Jr., nga nagtimaan sa pagsugod sa preparasyon sa nasangpit nga probinsya isip host.
“For a long time, the province of Agusan del Sur has aspired to host one of the most prestigious sporting events in the country, the Palarong Pambansa. With this in mind, we are strengthening our sports and youth development services along with the upgrading of our facilities, equipment, and tourist sites to promote sports tourism in the province,” matod ni Governor Cane sa iyang mensahe atol sa seremonya.
Gitaho nga hapit 30 ka tuig nang nangandoy ang Agusan del Sur nga ma-host ang Palaro, ug sa 2026, matuman na gyud ang ilang dugay nang damgo nga makaabi-abi sa libo-libong student-athletes gikan sa nagkalain-laing rehiyon sa Pilipinas.
Sa wala pa kini, nakadumala na usab ang Agusan del Sur sa 2024 Caraga Regional Athletic Games — nga nahimong paandam sa mas dako nga event sa sunod tuig.
Naglaum si Governor Cane nga ang ilang papel isip host sa Palaro makahatag ug inspirasyon sa mga batang atleta sa ilang probinsya aron maabot ang ilang potensyal sa natad sa sports.
“We accept this responsibility with pride and a deep sense of purpose. Our commitment is very clear: to deliver a safe, inclusive, and memorable Palarong Pambansa,” dugang pa ni Cane.
Ang kataposang Mindanao province nga mihost sa Palaro mao ang Davao City niadtong 2019. / RSC