Gihaya na si Patrolman Mark Gomer Ornopia sa Lungsod sa Tabogon, kadtong polis nga napusilan-patay sa usa ka gituohang tulisan nga nangilog og armas sa usa ka guwardiya sa Siyudad sa Danao niadtong Hunyo 27,2025.
Si Ornopia, 28, mas naila sa alyas nga “Makmak,” ang niresponde dihang nakadawat og taho nga dunay armado nga lalaki nga nailhan nga si Argie Catipay ug iya kining gigukod apan kalit nga namusil.
Ang polis ikatulo sa lima ka managsuon, minyo, dunay usa ka anak ug lumad nga taga Tabogon.
Matod ni Jay Niño Ornopia, maguwang sa biktima, pipila ka buwan pa lang nga na-assign ang iyang manghod sa Danao City Police Station sukad nahimo kining pulis.
Iyang gihulagway ang biktima nga matinabangon sa ilang pamilya ug di makamaong mobalibad kon manghangyo sila og tabang ug dedicated usab kini sa trabaho
Nasayran gikan sa pamilya ni Ornopia nga dayong duty niya niadtong adlawa nanugon kini nga dili kalimtan ang paglawog sa iyang mga rabbit.
“Amo nalang dawaton sa hinayhinay ug manghinaot nga magmalinawon ang iyang pagpanaw,” matod sa maguwang.
Gipasalig usab sa igsuon nga dili nila pasagdan ang asawa ug ang tres-anyos nga anak sa ilang manghod. / JDG