Kon mikita sa mga nangaging Kalagkalag pinaagi sa pagpangayo og bayad niadtong moduaw sa mga sementeryo nga buot magpalina o paaso, karong tuiga gipahunong na ang maong tradisyon sa Prevention, Restoration, Order, Beautification, and Enhancement (PROBE) team sa Cebu City.
Si Angeline Ramas, 20 nga nagnegosyo og palina sulod na sa napulo ka tuig nga iyang nasunod sa iyang mga apohan. Ang iyang panginabuhi matag Kalagkalag diin mikita siya og P3,000 sa miaging tuig, ang mikuwestiyon sa bag-ong patakaran sa PROBE.
Nasayran nga ang palina o ang pagpaaso gamit sa mga sagbot, dahon ug sanga ug tinuohan sa kinaraan nga makapapahawa sa mga espiritu.
“Gibawal man gud nila, imbis dili bawal. Angay man unta na sa minteryo unta,” matod pa ni Ramas.
Apan bisan pa man nipadayon gihapon si Ramas sa maong tradisyon nga sa gawas nga bahin sa sam-ang.
“Nanginabuhi sila, mas nanginabuhi ra man mi. Dili sila manghilabot sa tawo nga wala nanghilabot sa ilaha, nagpalayo na gani mi nila, arion pa jud mi,” ingon pa ni Ramas.
Dugang niya nga adunay higayon nga gibadlong siya sa mga sakop sa Probe ug gikuha pa ang iyang mga kinitaan.
Giduaw sa SunStar Cebu ang Calamba Cemetery, niadtong Huwebes sa hapon, Oktubre 31, 2024, diin si Ramas ra ang padayon sa paghimo og palina.
Samtang sa Carreta Cemetery, wala’y makita nga naghimo sa maong tradisyon.
Si Richiel Tigbao, manindahay og kandila miingon nga gidid-an na sab sila nga mohimo og palina sa Carreta, sigon sa mando sa PROBE.
Matod ni Tigbao, posibleng gi-ban kini tungod sa reklamo sa uban nga mga tawo nga nag-antos sa aso.
Ang SunStar Cebu misulay og kontak sa pangulo sa Probe Head Anderson Comar apan wala kini motubag atol niining pagsuwat sa taho. /CDF, JPS