Giawhag ang mga Katoliko nga Sugbuanon nga magkat-on sa pagsakripisyo ni Hesu Kristo sa krus ug ipakaylap ang kalinaw ug gugma sa uban sa pagtapos sa selebrasyon sa Semana Santa.
Mao kini ang mensahe ni Cebu Archbishop Jose Palma ngadto sa mga matuohon alang sa pagsaulog sa Easter Day, nga nagpasabot sa pagkabanhaw ni Hesus sa Semana Santa.
“Atong paghinaot nga madasig kita sa pagbuhat sa kabubot-on sa atoang Ginoo nga naghigugma nato nga nagpakamatay apan nabanhaw,” matod ni Palma sa recorded video message nga gipadala sa SunStar Cebu atol sa Black Saturday, Marso 30,2024.
Ang Semana Santa nailhan nga usa ka relihiyuso nga pag-obserbar sa Kristohanong kalendaryo, pagpasidungog sa panapos nga semana sa kinabuhi ni Hesu Kristo, lakip ang iyang paglansang sa krus ug pagkabanhaw.
Ang pagsaulog sa Katoliko karong tuiga nagsugod sa Dominggo sa Bendita sa Lukay, Marso 24, ug natapos sa Dominggo sa Pagkabanhaw, Marso 31.
Matod ni Palma nga ang pagbalik ni Kristo gikan sa mga patay nagdala og paglaum ug kalinaw sa katawhan.
Iyang giawhag ang mga matuohon sa pagbalos sa gugma sa Diyos pinaagi sa pagpakita og kaluoy sa uban ug mahimo’ng instrumento sa kalinaw sa kalibutan.
Gihatagan og gibug-aton sa obispo nga ang pagkabanhaw nagsimbolo sa paglaum ug katubsanan, dugang nga gipasabut nga ang bato nga nagsilyo sa lubnganan ni Kristo nagrepresentar sa sala, ug ang pagligid niini nagsimbolo sa grasya sa Diyos nga nipuli.
Sumala sa mga asoy sa Bag-ong Tugon sa Bibliya, human gilubong ni Jose nga taga Arimatea si Jesus sa usa ka lubnganan, iyang giligid ang usa ka dakong bato atubangan sa entrada aron pagsilyo niini.
Apan sa dihang si Maria Magdalena ug ang ubang mga babaye ningbisita sa lubnganan sa ikatulong adlaw human sa paglansang kang Hesus, ilang nadiskobrehan nga ang bato naligid na ug ang lubnganan walay sulod, nga nagpasabot sa pagkabanhaw ni Jesus.
“Busa maglipay kita kay sa iyang pagsulod, naangkon nato ang grasya sa bag-ong paglaom [ug] bag-ong kinabuhi,” matod niya.
Dugang pa, iyang gipasalamatan ang mga lokal nga parokya ug kaubang grupo sa lainlaing lungsod ug siyudad ubos sa artsidyosesis sa pag-organisar sa mga kalihukan sa Semana Santa sama sa mga prosesyon. /