Ipatawag sa National Bureau of Investigation (NBI) 7 sa Cebu City ang kandidato pagka gobernador nga si Pamela Baricuatro aron patubagon sa pasangil batok sa iyang gitukod nga foundation.
Ang NBI 7 nilusad og fact-finding investigation batok sa Simply Share Foundation Inc. (SSFI), usa ka charitable group nga gitukod ni Baricuatro, nga giingong naghimo og illegal solicitation activities.
Si NBI 7 Regional Director Rennan Augustus Oliva niluwat og subpoena alang ni Baricuatro,aron paatubangon kini sa ilang buhatan.
Ang imbistigasyon kalabot sa giingong kalapasan sa Presidential Decree 1564, o ang Solicitation Permit Law, ug sa Section 6 sa Republic Act 10175 o ang Cybercrime Prevention Act of 2012.
Sa iyang bahin si Baricuatro nisalikway sa pasangil ug nihulagway nga usa kini ka “harassment ug political persecution.”
Ang Department of Social Welfare and Development (DSWD) Central Office sayo niini, nikompirmar nga nilusad sab sila og buwag nga imbistigasyon sa fundraising sa SSFI.
Samtang ang Commander sa Naval Forces Central sa Philippine Army Commodore Joselito de Guzman nipatin-aw nga way pundo sa gobiyerno nga ilang nahatag sa foundation ni Baricuatro tungod kay boluntaryo kadto gikan sa ilang mga sakop nga nigahin sa ilang usa ka adlaw nga meal allowance nga tag P150 nga niabot og halos usa ka milyon ka pesos.
“It was given in good faith by individuals , from Navy personnel who volunteered. Iwan ko lang why give colors or something to it.” pasabot ni de Guzman.
Samtang ang Executive Director sa SSFI, Dr. Elisse Nicole Catalan nipasabot nga ang ilang kanhi volunteer nga si Bea Gomez nga nagbasi sa Manila ug nahimong Miss Universe Philippines maoy nihimo og initiative aron makapangita og tabang sa mga biktima sa Bagyong Odette dinhi sa Sugbo niadtong 2021.
Gihimo kadto ni Gomez isip civic duty isip volunteer ug gusto lang makatabang.
Matod niya nga sila sa SSFI nahimo lang taytayan aron makaabot sa mga biktima sa bagyo ang mga hinabang. / CDF / DPC