Gitinguha ni Cebu Governor Pamela Baricuatro ang pagdugang og mga obstetrician-gynecologist sa mga provincial hospitals human sa gikatahong insidente sa hospital sa probinsiya nga nikalas sa duha ka kinabuhi. Usa ka inahan ug ang gibuntis niining bata.
“One of our initial actions is to hire doctors, we are really in the process of hiring more. Sad to say but at the cost of life of an infant its really heartbreaking that’s why we should work harder so nothing like this will ever happen again,” matod ni Baricuatro sa Hulyo 24.
Unang nikatap ang maong hitabo human gidala sa pamilya sa biktima diha sa social media ang yangungo sa nakalas nga taga Lungsod sa Argao.
Sumala sa usa ka Facebook post sa usa ka Kiking Blues nga nailhan nga si Ronald Robusto, nagpailang igsuon sa bana sa pasyente nga si Airish Comaling, niadtong Lunes, Hulyo 21, didto sila sa Isdro C. Kintanar Memorial Medical Center (ICKMH) sa Lungsod sa Argao.
Pasangil sa biktima nga gi-refer sila ngadto sa Carcar Provincial Hospital (CPH) tungod sa komplikasyon sa pagbuntis sa inahan ug kinahanglan kining ipaubos sa caesarean (CS) operation.
Matod sa pamilya nga pag-abot sa CPH, nihangyo ang bana nga ipa-CS ang iyang asawa, apan giingong gisalikway kini sa mga doktor.
Dugang niya nga ang cervix sa inahan 3 cm pa lamang ug kinahanglan pa’ng hulaton nga maabot ang 10 cm.
Subay niini, giingong naabtan na sila og buntag ug nibalik na usab ang bana alang sa paghangyo sa doctor sa pagpaubos sa iyang asawa sa operasyon, apan giingong nibalibad gihapon.
Giingong gi-refer sila ngadto sa hospital sa Dakbayan sa Talisay, apan nabugtoan na sa gininhawa ang inahan.
Tungod niini, gimando ni Baricuatro ang imbestigasyon kalabot sa kamatayon sa inahan ug sa gisabak niini.
Ang invistigating team pangulohan sa Cebu Provincial Health Office ubos sa pagdumala ni Dr. Mary Ann Josephine Arsenal, PHO Officer-In-Charge sa Hulyo 24, 2025.
Matod ni Arsenal nga base sa inisyal nga datos ug talaan gikan sa mga hospitals nga nalambigit sa maong insidente, giingong gi-admit ang pasyente sa alas 2:00 sa hapon sa Lunes, Hulyo 21, 2025 sa ICKMH.
Dugang ni Arsenal nga subay sa nasayran, nibuto na ang panubigon sa biktima sa alas 4:00 sa buntag sa Hulyo 21.
“Premature bag of water ni siya daan to start with. Ni-rupture na ni daan ang iyang bag of water sa ilang balay pa lang sa wala pa siya niabot sa hospital. So mao nang gitawag og premature rupture of membrane so naa na siyay additional nga negative nga (epekto),” matod ni Arsenal.
Aron mahatagan og pagtagad ang tinguha niining ipaubos sa CS operation ang biktima, giingong gi-refer siya sa Carcar Provincial Hospital diin siya na admit sa alas 7:42 sa gabii sa samang adlaw.
Gipasabot ni Arsenal nga niadtong higayona, giingong gi-monitor sa Obgyne ang pasyente ug gihatagan pa og ampicillin nga usa ka antibiotic aron maalibyohan ang bisan unsang bacterial infections sa lawas.
Giingong stable usab ang vital signs sa pasyente sa wala pa molakaw ang Obgyne sa Martes, Hulyo 22, 2025.
“Gina-monitor siya mo-average gyud iyang FHT (fetal heart tones) 150-130 -160. So meaning ana kon magkaubos gani na siya in-distress nana siya,” matod ni Arsenal.
“Mao to nga niingon ang OB nga there is no indication for a cesarean section,” dugang niya.
Pagpuli na sa General Practitioner (GP) sa samang adlaw, gisusi niini pag-usab ang pasyente apan sa alas 9:00 sa buntag nasuta nga anaa sa fetal distress ang kahimtang sa bata sa sulod sa tiyan.
Pasabot niini nga dili mayo ang heartbeat ug kuwang ang oxygen sa bata sa sulod sa tiyan.
Hinungdan nga giingong gipadali og refer sa CPH ang pasyente paingon sa Cebu South Medical Center (CSMC) nga gidumala sa Department of Health (DOH) sa alas 11:04 sa buntag.
Diha sulod sa ambulansya, giingong stable pa ang vital signs o ang panglawas sa inahan apan distressed na ang bata.
Pag-abot sa tambalanan, giingong gi-deliver pa ang bata ug gisuwayan pa kini pagbuhi apan giingong patay na dihang nigawas.
“Base sa incident report nga niabot sa amo pag abot sa CSMC, gi-endorse na nila sa doctor ug midwife gi-deliver nila ang bata unya gi-try pa nila og resuscitate ang bata but ang mother maayo ra gyud ang vital signs, wala na mi kahibalo after that,” dugang ni Arsenal.
Subay niini, gipasalig ni Baricuatro nga magpadayon ang imbestigasyon sa kapitolyo sa nahitabo.
Sa kasamtangan, nakapadala na og grocery items ang kapitolyo pinaagi sa Provincial Social Welfare and Development (PSWDO), dugang tulo ka sako sa bugas, P10,000 nga burial assistance ug personal nga tabang ni Baricuatro. /