Sa dili pa magsugod sa iyang termino karong Hunyo 30 si Cebu governor-elect Pamela Baricuatro, nakakuha na siya og suporta gikan sa mga medical professionals ug mga negosyante aron tumanon ang iyang saad sa kampanya nga palambuon ang sistema sa pag-atiman sa panglawas ug ang ekonomiya alang sa iyang mga konstituwente.
Tinguha ni Baricuatro nga makamugna og trabaho alang sa mga Sugboanon ug pagbansay sa sektor sa Information Technology ug Business Process Management (IT-BPM).
Niadtong Biyernes, Hunyo 13, mipadayag og kabalaka si Baricuatro atol sa iyang pagbisita sa Pinamungajan District Hospital tungod sa kakuwang og mga doctor ug nurse sa maong establisemento.
Pagka Hunyo 14, Sabado, nakigkita siya sa mga doktor nga miapil sa miting sa Cebu Cancer Coalition nga gihimo sa City Sports Club Cebu.
Gipahayag ni Baricuatro ang kabalaka sa kahimtang sa ospital.
Iyang gipasiugda nga ang isyu naggumikan sa mga kakulian sa sistema imbes sa dedikasyon sa mga kawani niini.
Atol sa iyang pagbisita, ang opisyal nagpahayag og pasalamat sa mga health care worker, lakip na ang mga doktor, nars, ug mga administrative staff, nga padayon nga naghatag og serbisyo bisan pa sa lisud nga kahimtang.
Ang Pinamungajan District Hospital nga gidesenyo alang sa pagserbisyo sa gibanabanang 75 mil ka mga residente sa dapit, nag-atubang karon og daku’ng hagit tungod sa kakuwang sa resources.
Sa sayo pa niadtong Huwebes, Hunyo 12, nakigkita usab si Baricuatro sa mga miyembro sa Cebu Medical Society (CMS) ug ang diskusyon nakasentro sa mga paagi sa pagbangon pagbalik sa mga serbisyo sa pag-atiman sa panglawas.
Sa iyang miting uban sa mga miyembro sa Cebu Cancer Coalition, gipasiugda sa governor-elect nga ang "wisdom, heart, and collaboration" sa mga doktor importante aron mapaayo ang sistema sa pag-atiman sa panglawas sa mga pasyente nga nagkinahanglan og espesyalista nga doktor.
"It is a great honor and privilege to join medical professionals who sincerely serve Cebuanos battling cancer," matud ni Baricuatro.
Nakigkita usab si Baricuatro sa Executive Officer sa Board of Trustees sa CIB.O (Cebu ICT-BPM Organization) aron hisgutan ang tumong sa probinsya nga mahimong sentro sa inobasyon ug digital excellence.
Matud ni Ace Durano, consultant ni Baricuatro alang sa Economic Development, sa usa ka post niadtong Lunes, nga ang CIB.O ug ang mga miyembro niini misaad nga mopahigayon og training og mo-offer og mga job opportunity alang sa mga Sugboanon.
Nakigkita usab si Baricuatro sa mga representante gikan sa lain-laing mga asosasyon sa shipyard nga nagtumong sa pagpalambo sa sektor sa maritime ug shipbuilding ug repair sa Sugbo.
Gilaraw usab niya ang usa ka mas lig-on nga ekonomiya sa maritime nga nakabase sa kolaborasyon, inobasyon, ug inklusibo nga pag-uswag.
Niadtong Hunyo 9, nagpahigayon si Baricuatro og diskusyon uban sa mga representante gikan sa Japan International Cooperation Agency (JICA), nga nakasentro sa nagpadayon ug umaabot nga mga proyekto sa imprastraktura nga nagtumong sa pagpalambo sa mobility, logistics, ug malungtarong pag-uswag sa kasyudaran sa Sugbo.
"These initiatives reflect JICA’s enduring commitment to supporting Cebu’s progress through innovation, resilience, and strategic planning," ingon ni Baricuatro. / EHP