GIKONDENAR ni Governor-elect Pamela “Pam” Baricuatro ang last-minute nga lakang ni outgoing Governor Gwendolyn Garcia sa pagmando sa pag-umol sa nagkadaiyang trust funds sa mga programa pipila ka semana sa dili pa ang kausaban sa administrasyon sa kapitolyo.
Si Baricuatro diha sa iyang official social media page nihulagway nga usa ka dayag nga pagsalikway sa principles sa good governance ug democratic transition lakip na ang pagsupak sa legal ug ethical standards.
Kini subay sa giluwatan nga mando ni Garcia nga Memorandum No. 36-2025.
Matod ni Baricuatro nga kini nga lakang pagpakita lamang sa pag-abusar sa gahum sa tinguha nga giingong mababagan ang bag-ong administrasyon.
“This act of sabotage undermines the trust placed in us by the people of Cebu and threatens the fiscal integrity of our province. It is an abuse of power designed to hinder the incoming administration’s ability to serve effectively,” matod ni Baricuatro.
“Such actions are a stark reminder of the need for vigilance against political maneuvers that seek to entrench influence beyond one’s term.” dugang niya.
Subay niini, mohimo og pagsusi ang kampo ni Baricuatro sa naasoy'ng memorandum.
Iyang gisaad nga mohimo og legal nga lakang aron pagsiguro nga mahimong transparent ang tanan nga transaksyon pinasubay sa balaod.
Samtang una na nga gipasabot ni Garcia nga ang maong memorandum nagtugot nga makapadayon sa mga nasugdan niining programa sa Sugbo atol sa iyang administrasyon. / ANV