UYON si Cebu Governor Pamela Baricuatro sa sugyot ni Senador Francis ‘Chiz’ Escudero nga i-ban ang mga paryente ug sakop sa pamilya sa mga opisyal nga nagsilbing suppliers ug kontraktor sa gobiyerno.
“I’m actually happy that the Senate President filed that bill cause I think it’s about time. Dili dapat na iapil og negosyo ang gobiyerno,” matod ni Baricuatro sa Miyerkules, Hulyo 30.
Gikalipay sa gobernadora ang maong balaudnon aron pagpitol sa mga niani og kickbacks gikan sa mga proyekto nga backdoor ug under-the-table nga transaksyon.
Sa nasayran, sa Martes, Hul-yo 29, si Escudero nipadayag sa iyang intensyon nga moduso og balaudnon nga did-an na ang mga magbabalaod o mga opisyal sa gobiyerno hangtod sa fourth civil degree of consanguinity and affinity isip suppliers sa mga proyekto sa gobiyerno.
Kini agi’g tubag sa panawagan ni Presidente Ferdinand R. Marcos Jr. batok sa korapsyon, conflict of interest, ug ang dili insaktong paggamit sa mga pundo sa gobiyerno subay sa iyahang uwahing State of the Nation Address (Sona).
Kahinumdoman nga gidayeg ni Baricuatro ang hugot nga baruganan sa presidente pagpakigbatok sa kurapsyon. / ANV