Opisyal na nga nagsugod ang Habagat (Southwest Monsoon), timailhan nga mosugod na sab ang panahon sa ting-ulan sa nasod, sumala sa Philippine Atmospheric, Geophysical, and Astronomical Services Administration (Pagasa).
Matod sa weather specialist sa Pagasa Visayas nga si Ever John Tenio, ang Habagat kasagaran nga nag-apekto sa kasadpang bahin sa Pilipinas.
Apan, ang epekto niini mahimong moabot sa Central Visayas, lakip na ang Sugbo, kon kini pakusgon sa usa ka bagyo (tropical cyclone) nga nahimutang sa amihanang-sidlakang bahin sa nasod o sa sulod sa Philippine Area of Responsibility (PAR).
“Base sa nangaging mga tuig, kon pakusgon sa bagyo ang habagat, ang Central Visayas makasinati og mapanganuron nga kalangitan ug kanunay nga pag-ulan nga mahimong molungtad sa tibuok adlaw,” pasabot ni Tenio.
Ang mga awtoridad kasamtangang nag-monitor sa tropical storm Domeng, nga posibleng mokusog pa isip usa ka bagyo.
Ang mga forecaster nag-atang usab sa posibleng low-pressure area (LPA) sulod niining semanaha hangtod sa Hunyo 3. / DPC