Panday gipusil kay `drugas gitambling’

Cebu City map.
Cebu City map.

Usa ka kanhi panday nga giingong nanambling og ilegal nga drugas gipusil alas 3 sa hapon niadtong Biyernes sa Sitio San Roque, Brgy. Basak San Nicolas, dakbayan sa Sugbo.

Ang biktima giila nga si Gerald Mantalaba Ocsio, 40, dunay kapuyo, nagpuyo sa dapit.

Siya daling gidala sa Cebu City Medical Center (CCMC) apan gibalhin sa laing tambalanan kay ang iyang samad sa liog nagkinahanglan og dugang pagtagad.

Wala pa madakpi sa kapulisan ang suspek nga giilang si Ravin Bautista, 29, ex-convict, taga Brgy. Quiot, dakbayan sa Sugbo.

Matod ni Patrolman Glendale Cabañero, imbestigador sa Mambaling Police Station nga nahinabi sa Superbalita Cebu, ilegal nga drugas ang motibo sa krimen.

Gisubay nila ang impormasyon nga wala makabayad ang biktima sa gibaligya’ng drugas.

“Sa nakuha natong impormasyon, niundang ning biktima sa pagpamanday. Namaligya’g shabu kay mas dako daw siya’g income,” butyag ni Cabañero

Apan gikataho’ng dunay wala niini mabayri ang biktima hinungdan nga siya giinitan sa suspek.

Ang biktima nga naglakaw padulong mopauli sa ilang balay wa nakabantay sa suspek nga nag-atang kaniya.

Diretso siya nga gipusil, diin ang bala niigo sa iyang liog ug nilapos sa baba.

Matod ni Cabañero nga ang suspek nabilanggo kaniadto sa kasong pagpatay apan nakagawas.

Nalambigit usab kini sa pagpamaligya og ilegal nga drugas, dugang niya. Wa pa masayod ang kapulisan sa labing uwahi nga kahimtang sa biktima sulod sa tambalanan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph