GIPADAKOP sa kapuyo ang panday human siya gidagmalan alas 3:15 sa hapon, Lunes, Hunyo 23, 2025, sa Sitio Rotola, Barangay Guadalupe, Dakbayan sa Sugbo.
Ang biktima nga si Sam, 31, nakapangayoog panabang sa kapulisan ug gipadakop ang iyang kapuyo nga si JV, 32.
Si JV gitangong sa Guadalupe Police Station ug mag-atubang og kasong kalapasan sa RA 9262.
Nibutyag si Sam nga makaupat kahigayon siyang gisumbag ni JV, gibunlot iyang buhok, ug giguroy pagawas sa ilang panimalay.
Nanghimakak ang suspek sa pasangil apan nangayog pasaylo sa iyang nahimong sayop.
Naglagot ang suspek kay nagsige og duwa og tong-its iyang kapuyo bisan gibadlong na apan wala gyud mopatuo.
Niasoy ang suspek nga sa miaging buntag, ni-duty siyang walay kaon kay wala mag-lutog sud-an si Sam. / GPL