Uwahi na ang pagbasol sa usa ka panday nga nagduwa sa iyang kinatawo atubangan sa usa ka estudyante human siya gipadakop sa alas 7:00 sa buntag sa Lunes, Pebrero 17, 2025, sa Barangay Parian, Siyudad sa Sugbo.
Si alyas “Dokdok” 29, minyo, lumad nga taga Zamboanga City apan temporaryong nagpuyo sa Barangay Parian, gitanggong sa Waterfront Police Station 3 sa Cebu City Police Office (CCPO) tungod sa reklamo sa 21 anyos nga babayeng estudyante.
Si alyas Joy nagbarog daplin sa dalan kay dunay gipaabot duol sa usa ka unibersidad dihang iyang nakita ang suspek nga nagduwa sa iyang kinatawo atubangan niya.
Nagpakitabang si Joy sa guwardiya sa tunghaan ug gidakop ang panday .
Si Dokdok niangkon sa iyang sayop nga nabuhat ug nipasabot nga dili ang tinun-an maoy iyang gitripingan.
“Nagtan-aw ko sa mga sexy nga babaye sa akong selpon! Gimingaw nako sa akong asawa ug makuyawan sab ko mangita sa duol,” pasabot ni Dokdok dihang nahinabi sa mga tigbalita.
Nangayo og pasaylo ang suspek sa sayop nga iyang nabuhat.
Niangkon sab si Dokdok nga sa ka-busy sa trabaho ug kalayo sa iyang asawa, walo na ka buwan nga wala na siya makagamit og babaye.
Kasong kalapasan sa RA 11313 o “Safe Spaces Act o (Bawal Bastos Law)” ang atubangon nga kaso sa suspek. /GPL