USA ka panday ang nadakpan atol sa buy-bust nga gipahigayon sa mga sakop sa Municipal Drugs Enforcement Unit sa San Francisco Police Station sa alas 12:10 sa udto, Huwebes, Agusto 7, 2025 sa Barangay Montealegre, Lungsod sa San Francisco sa isla sa Camotes, Sugbo.
Ang suspek giila nga si Regie Dela Peña alas Bossing, 49, minyo, nagpuyo sa nahisgutang lugar.
Lakip sa napusasan ang nipalit niyag shabu nga si Kent Erwin Dañas Rosal, 29, ulitawo, graphic artist nga molupyo sa maong barangay, ug ang negosyante nga si Joraldine Amistad Igot, 44, minyo, taga Lungsod sa Tudela, Camotes.
Si Police Major Vincent Zozobrado, hepe sa San Francisco Police Station, mibutyag sa Superbalita Cebu nga ilang gi-buy bust si Dela Peña, human nila kini namonitor nga namaligya og ginadiling drugas.
Nakuha gikan ni Dela Peña ang drugas nga motimbang sa 3.3 gramos nga gibana-banang mobalor sa P22,440. / GPL
