Ang kanhi chief presidential legal counsel ni kanhi Presidente Rodrigo Duterte nga si Atty. Salvador Panelo niingon nga ilegal ang pagdakop ni Duterte basi sa warrant nga giisyu sa International Criminal Court (ICC).
Sa usa ka pahayag, si Panelo niingon nga si Duterte gihikawan sa legal nga representasyon sa panahon sa iyang pagdakop sa dihang ang Philippine National Police (PNP) wala motugot sa iyang mga abogado nga makigkita kaniya sa iyang pag-abot sa airport.
“The PNP could not have a hard copy (of) the warrant (of) arrest. By not allowing one of his lawyers to meet him, the arresting [officer] could avoid being asked if they have the hard copy of the arrest warrant,” matod niya.
“It is an illegal arrest because the ICC arrest warrant comes from a spurious source, the ICC, which has no jurisdiction over the Philippines,” siya nidugang.
Si Panelo niingon nga ang mga arresting officers mahimong manubag sa krimen tungod sa supak sa balaod nga pagdakop ni Duterte.
Si Duterte gidakop sa iyang pag-abot sa Ninoy Aquino International Airport Terminal 3 niadtong Martes sa buntag gikan sa Hong Kong.
Uban sa iyang asawa nga si Honeylet ug anak nga si Veronica, gidala sila sa VIP lounge sa Villamor Airbase og gibasahan sa Miranda Rights ni Criminal Investigation and Detection Group (CIDG) Director Major General Nicolas Torre.
Si Duterte niingon nga wala siya kahibawo sa legal nga basihanan sa iyang pagkapriso.
“Show to me now the legal basis of my being here. Apparently, I was brought here not of my own volition…so you have to answer now for the deprivation of liberty,” nagkanayon ang kanhi presidente.
Si Presidential Communications Office (PCO) nikumpirmar sa pagluwat og warrant of arrest batok kang kanhi Presidente Rodrigo Duterte sa International Criminal Court (ICC).
Sa usa ka pamahayag, ang PCO nagkanayon nga nadawat sa International Criminal Police Organization Manila (Interpol) ang kopya sa warrant of arrest nga giisyu sa ICC batok kang Duterte niadtong Martes sa kadlawon, Marso 11, 2025. Gi-serve sa mga opisyal sa Interpol Manila ang warrant of arrest sa pag-abot ni Duterte sa Manila gikan sa Hong Kong mga alas 9:20 sa buntag.
Ang kampo ni Duterte nipasaka na niadtong Martes, Marso 11, 2025, og petisyon sa Korte Suprema (SC) alang sa pagpagawas sa usa ka temporary restraining order (TRO) batok sa pagpatuman sa warrant of arrest nga giisyu sa ICC batok kaniya.
Ang abogado nga si Israelito Torreon nga nagsilbi usab nga abogado sa lider sa Kingdom of Jesus Christ (KOJC) nga si Pastor Apollo Quiboloy, nipasaka og petisyon alang sa certiorari ug prohibition sa SC nga nangayo sa pagpagawas sa TRO ug writ of preliminary prohibition ug mandatory injunction kalabot sa pagdakop ni Duterte.
Gihinganlan nga mga respondent mao sila si Executive Secretary Lucas Bersamin, Justice Secretary Jesus Crispin Remulla, Philippine National Police (PNP) Chief General Rommel Marbil, Criminal Investigation and Detection Group (CIDG) Director Major General Nicolas Torre, Solicitor General Menardo Guevarra, Bureau of Immigration Commissioner Norman Tansingco, Foreign Affairs Secretary Enrique Manalo, ug Armed Forces of the Philippines (AFP) Chief of Staff Romeo Brawner. / TPM / SunStar Pilipinas