Pangandam sa Palaro '24

Cebu City Sports Center
Cebu City Sports CenterFile Photo

Ang mga pag-andam para sa Palarong Pambansa 2024 anaa gihapon sa tukmang panahon bisan pa kon adunay temporaryong kausaban sa pamunoan sa Cebu City.

Si Francis Cesar Bringas, sekre­tar­yo-heneral alang sa Palarong Pambansa 2024, nipadayag kaniadtong Huwebes, Hunyo 13, nga adunay pipila ka mga butang nga kinahanglan pa palambuon bahin sa kinatibuk-ang pagpangandam, ilabi na sa oval track.

Kauban ni Bringas si Acting Mayor Raymond Alvin Garcia ug ang chairman sa Cebu City Sports Commission nga si John Pages sa pagbisita sa Cebu City Sports Center (CCSC) kaniadtong Huwebes, aron susihon kon adunay pa bay mga hagit sa pag-host sa maong sporting event.

Sa bahin sa billeting quarters, giingon ni Bringas nga ang matag rehiyon nga moapil nakabisita na sa ilang gikatakdang quarters, ug wala nay mga isyo hangtod karon.

“Konting-konting adjustments na lang ang buhaton depende na lang sa specifications sa atong mga regional delegations, okay naman sila, wala nay problema,” matod ni Bringas.

Gidapit usab ni Bringas ang tanan nga moanhi sa Cebu gikan sa Hulyo 9 hangtod Hulyo 16, 2024, aron mosaksi sa sporting events.

Samtang, nagpasalamat si Garcia kang Bringas sa pag-anhi aron susihon ang kalambuan sa pag-andam.

Ang acting mayor niingon nga nalipay siya sa gipadayag ni Bringas, nga niingon nga siya kuntento sa mga pagpangandam.

Sa iyang bahin, si Pages niingon nga si Bringas ania alang sa upat ka adlaw nga Palaro Final Technical Conference nga gipahigayon sa Crown Regency Hotel nga nagsugod sa Miyerkules, Hunyo 12.

Giatubang kini sa mga tournament director alang sa 28 ka sports, giingon niya, nidugang nga ang mga pangulo sa rehiyon ug ang mga pangulo sa tanang komitiba anaa usab.

Gisaysay usab ni Pages nga ang mga pangulo ningbisita sa mga venue alang sa matag sport kaniadtong Hunyo 12, giingon nga sa kinatibuk-an, andam na ang tanan. / AML

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph